Joe Biden skal snart velje visepresident­kandidat: – Kan bli den første kvinna med ein vinnarsjanse

I mars sa Joe Biden at han ville ha ei kvinne som visepresidentkandidat. Biden har fleire gongar brote eigne tidsfristar for offentleggjeringa av kandidaten, men namnet må vere ute før Demokratane formelt vel Biden som presidentkandidat på landsmøtet, som opnar måndag neste veke.

I mellomtida går spekulasjonane om kven som blir kandidaten. Senatoren Kamala Harris, som sjølv prøvde å bli presidentkandidat, har lenge vore ein favoritten til mange. Men også andre namn har vore nemnde som moglege kandidatar.

Blant dei er senator Elizabeth Warren, kongressrepresentant Karen Bass og Susan Rice, som har hatt fleire toppjobbar i amerikansk politikk.

– Første kvinne med vinnarsjansar

To gongar tidlegare har dei leiande politiske partia i USA stilt med ei kvinne som visepresidentkandidat.

Første gong det skjedde var i 1984 då Walter Mondale valde seg Geraldine Ferraro som sin kandidat. Dei tapte stort for Ronald Reagan og George H.W. Bush.

Og i 2008 måtte John McCain og Sarah Palin gi tapt for Barack Obama og nettopp Joe Biden.

Både Ferraro og Palin blei valde for å overraske, seier førsteamanuensis ved juridisk fakultet ved Universitetet i Oslo, Sofie Høgestøl, som følger amerikansk politikk tett.

– Det var kampanjar som ikkje låg an til å vinne. Men i år, og mykje kan skje, ligg Biden godt an. Så dette kan bli den første kvinna som blir visepresidentkandidat som har ein realistisk sjanse til å vinne. No vel dei ikkje ei kvinne fordi dei ligg bak og ønsker å gjere noko dristig, ein vel ei kvinne av andre grunnar, seier ho.

Grundige vurderingar

Biden har brukt god tid på å bestemme seg for kven han skal stille saman med. Det er viktig med grundige kartleggingar for å finne den beste kandidaten til jobben som visepresident.

Men det har også gjort at mange kvinner har blitt løfta fram i media som mogelege kandidatar, i eit USA der kvinnelege politikarar på toppnivå er i kraftig undertal, seier Høgestøl.

– Ved å bruke tid har ein del kvinner fått meir merksemd og blitt meir kjende i media. Så uavhengig av kven som blir visepresidentkandidat, trur eg vi kjem til å sjå mange av desse kvinnene i amerikansk politikk i åra som kjem.

Ho meiner lista over kandidatar også gir ein peikepinn på kven som kan vere aktuelle til ministerpostar, dersom Biden skulle vinne.

– Namn som Elizabeth Warren og Susan Rice kan vere aktuelle i andre roller, som finansminister og utanriksminister, dersom Biden blir president.

Kva namn som skal stå saman med Joe Biden på Demokratanes valsetel, veit vi før 17. august.