Det har ikkje kome offisielle israelske kommentarar til sjokkvalet i dei palestinske områda, men israelsk fjernsyn melder at Ehud Olmert har kalla inn til ekstraordinært møte i det israelske tryggingskabinettet.
I går kveld sa Olmert at Israel ikkje kan godta Hamas i ei palestinsk regjering. Høgreopposisjonen i landet har rast mot at Israel ikkje stansa Hamas si deltaking i valet, og vil bruke Hamas-sigeren for alt det er verd.
Forsvarsminister Shaul Mofaz, som tidlegare har gitt ordre til militæraksjonar på Gazastripa og på Vestbreidda, samt målretta drap på Hamas-leiarar, seier at regjeringa ikkje vil kommentere valresultatet før det er offisielt.
Det offisielle valresultatet blir truleg ikkje klart før klokka 18 i kveld.
Det palestinske valet er det største sjokket statsminister Ehud Olmert har opplevd sidan han tok over etter Ariel Sharon.
Politiske observatørar trur sjokkvalet i dei palestinske områda vil få stor innverknad på det komande parlaments- og statsminsitervalet i Israel. Det kan føre hauken Benjamin Netanyahu tilbake til makta. (NRK-AFP)