Hopp til innhold

Israel feirar 70 år med sjølvstende

Israel starta onsdag feiringa av sin 70-årsdag, med fyrverkeri og ei flammande tale av statsminister Benjamin Netanyahu. Palestinarane kallar dagen for ei katastrofe.

Feiring israel

Israelarar kom ut i gatene for å feire at det er 70 år sidan landet deira fekk sjølvstende.

Foto: Menahem Kahana / AFP

Både i Jerusalem og Tel Aviv hadde folk samla seg for å sjå på fyrverkeriet under feiringa av 70-årsdagen til Israel.

Dagen er ei markering for kunngjeringa av sjølvstende av tidlegare statsminister David Ben-Gurion i 1948, og feiringa starta ved solnedgang.

I Jerusalem vart det halde ein tradisjonell fakkelseremoni, og etterpå var det utandørskonsertar og folk dansa i gatene. Feiringa skal etter planen vare til laurdag kveld.

Feiring Israel

Folk samla seg på Rabin-plassen i Tel Aviv for å sjå på fyrverkeriet under feiringa av 70-årsdagen til Israel.

Foto: Oded Balilty / AP

Åtvaring til Iran

Benjamin Netanyahu

Statsminister Benjamin Netanyahu sa i tala si at «vi styrer Israel mot å bli ei aukande verdsmakt».

Foto: Debbie Hill / AFP

I tala si kom statsminister Benjamin Netanyahu med ei åtvaring til Iran, som Israel ser på som ein stadig større trugsel. Han sa at Israel kjem til å forsvare seg mot alle som prøver å skade dei.

– Vi veit å forsvare oss med våre eigne styrkar, det er essensen av sjølvstende. Vi er sterkare enn nokon gong, sa Netanyahu.

Han brukte også tala til å seie kor mykje Israel set pris på ein sterk allianse med USA.

– Vi er alle glade for den historiske avgjerda til president Trump, om å seie at Jerusalem er vår hovudstad, og for å flytte den amerikanske ambassaden hit, sa Netanyahu til stor jubel.

Jubel eller katastrofe?

Hanne Eggen Røislien

Sjølvstendedagen er også ein dag med stor spenning i Israel, seier religionshistorikar, Hanne Eggen Røislien.

Foto: Privat

Sjølvstendedagen vert markert ulikt blant israelarane og palestinarane, seier religionshistorikar, Hanne Eggen Røislien.

– Medan israelarane feirar, kallar palestinarane dagen for «nakba», eller katastrofe, og derfor er dette ein dag med mykje spenning, seier Røislien.

I tillegg til 70-årsmarkeringa har det vore mykje uro på Gazastripa dei siste vekene.

– Derfor er det interessant å sjå kva som skjer i løpet av dei neste vekene, når den amerikanske ambassaden skal flyttast frå Tel Aviv til Jerusalem, seier Røislien.

SISTE NYTT

Siste nytt