IS trugar Unesco-byar i Libya

Medan USA og deira allierte styrkar innsatsen mot IS i Syria og Irak, har den ekstremistiske gruppa kapra nye område, langt frå den opprinnelege kjernen. Terrorgruppa skal no ha rundt 3000 krigarar i Libya, eit land prega av kaos og vald sidan Gaddafis fall i 2011 - men også eit land fullt av arkeologiske skattar.

• Les også: Verdens kulturarv ødelegges av krig - her er de 10 mest sentrale

– Øydelegging vil vere ei kulturell skandale

Førre veke annonserte IS at dei hadde teke kontroll over den romerske ruinbyen Sabratha, som er på Unesco si verdsarv-liste.

Byen ligg rundt 50 mil vest for hovudstaden Tripoli, og skal sidan i fjor vore styrt av Libysk daggry. Opprørsgruppa dreiv den internasjonalt anerkjende regjeringa på flukt i fjor og sette inn si eiga regjering i Tripoli. Eksilregjeringa er no i Tobruk, og etter forhandlingar i lengre tid kan det no gå mot ein fredsavtale i FN-regi.

• Les også: Stormakter presser på for samling i Libya

Men medan fredsforhandlingane held fram har IS har fått fotfeste også austafor Tripoli, og også her er romerske ruinar truga. IS rykka nyleg frå Gaddafis heimby Sirte mot Khoms. Her ligg Leptis Magna, tidlegare hovudstad i den afrikanske provinsen i Romarriket, som vert rekna for å vere ein av ruinane i verda som er best teke vare på.

Øydelegging av dei libyske ruinane, som minst er like høgt verdsett som dei i syriske Palmyra, vil verte sett på som ei kulturell skandale, skriv The Telegraph.

IS styrkar seg utanfor Syria og Irak

Området på kystlinja mot Tunisia har etter Gaddafis fall i 2011 vore kontrollerte av islamistiske grupper, mellom anna Ansar al-Sharia, som skal ha hatt treningsleirar i området for både libyske og tunisiske islamistar.

Det var i ein militærleir i Sabratha at terroristen som drepte 38 i Sousse i Tunisia i sommar hadde fått trening.

• Les også: Ondskapens hotell

Fleire medlemmer frå Ansar al-Sharia har meldt overgang til IS, men gruppene skal også samarbeide, skriv Huffington Post, som trur at dei vil slå seg saman om IS held fram med Libya-framstøtet.

Libyarar og tunisarar utgjer dei største kontigentane av framandkrigarar i Syria og Irak, og mangelen på stabilitet aukar uroen for kva eit sterkare IS kan føre med seg her.

Islamske grupper i fleire land skal lenge ha flagga støtte til IS, men det siste året skal IS ha endra strategi og skaffa seg meir direkte kontroll utover kjerneområdet i Irak og Syria.

I tillegg til Anshar al-Sharia i Libya skal også nigeriske Boko Haram skal ha sverga truskap til terrorgruppa, og i somalske al-Shaabab skal det ifølge The Guardian vere usemje om ein skal halde fram med å vere knytt til al-Qaida eller om ein skal skifte over til IS.

• Les også: Frankrike bombar IS' «hovedstad» i Syria