Ein sint Mohammed Morsi talte på egyptisk fjernsyn søndag.
Han følgde tilrådinga som det nasjonale forsvarsrådet kom med laurdag, og erklærte unntakstilstand og innførte portforbod i dei tre Suezkanal-provinsane Port Said, Ismailiya og Suez.
Desse byane er hardast råka av den politiske uroa som har kravd meir enn 50 menneskeliv i løpet av dei siste tre dagane.
- LES OGSÅ: 30 drept etter dødsdom for fotballopptøyer
- LES OGSÅ: Voldsomme opptøyer mot Morsi
Hundrevis trossar forbodet
I den kringkasta talen ga presidenten klar beskjed om at han ikkje ville nøla med å setja i verk enda meir drastiske tiltak for å få bukt med opptøyane.
I Ismailiya, aust for hovudstaden Kairo, tok om lag 200 menneske til gatene i protest like etter at portforbodet blei innført. «Ned med Morsi, ned med unntaktstilstanden», ljoma det frå folkemengda.
Menneskerettsaktivistar seier unntaktstilstanden vil gje politiet vide fullmakter til å arrestera folk som dei meiner utgjer ein fare for tryggleiken i samfunnet.
Krisemøte måndag
Morsi inviterte også alle sentrale politiske krefter i landet til å setja seg saman for å løysa den alvorlege krisa som no rir landet.
Politikarane i det nordaust-afrikanske landet vil dermed samla seg til krisemøte førstkomande måndag.
Mange egyptiske borgarar er svært misnøgde med utviklinga i landet etter revolusjonen, og meiner dei nye politiske leiarane ikkje har innført reformane som var lova, ei styrkja dei demokratiske institusjonane.