Hotellkollaps i Tyskland – to døde

I feriebyen Kröv i Tyskland kollapsa eit lite hotell tysdag kveld. Ni menneske blei gravlagde under ruinane over natta.

Seint onsdag kveld blei den siste overlevande henta ut. Da hadde den skadde kvinna vore fastklemd i eit døgn.

Sju personar har blitt redda ut i live. Blant dei var ein nederlandsk familie med eit to år gammalt barn.

– Eg har aldri vore så glad for å sjå eit framandt barn, sa Teusch til den tyske kringkastaren Südwestrundfunk (SWR) om redninga.

Ei kvinne og ein mann døydde i kollapsen. Begge har no blitt henta ut frå ruinane.

Svært krevjande

Lenge klarte ikkje brannvesenet å ta seg inn i ruinane på grunn av fare for ytterlegare kollaps av det vesle hotellet, melde SWR.

Redningsarbeidet blir sett på som svært krevjande. Om lag 250 redningsmannskap er til stades med dronar og redningshundar.

Historisk tak kollapsa

Det var til saman 14 gjestar på hotellet. Fem av dei skal ha klart å ta seg ut på eigehand. Ein av dei fortalde til SWR at han var på do då kollapsen skjedde.

Det to etasjars bygget skal ha falle i hop seint tysdag kveld etter at saltaket kollapsa, skriv den tyske kringkastaren. Taket i underetasjen skal ha vore frå 1600-talet.

Ifølge SWR høyrde augevitne på staden eit smell i området litt før kl. 23 tysdag kveld.

I tillegg til politi, brannmannskap og helsepersonell, er også bygningsingeniørar til stades.