Hongkong-aktivisten Joshua Wong arrestert

Hongkong-aktivisten Joshua Wong blei arrestert torsdag for å ha deltatt i ei «ulovleg samling». Tre timar seinare blei han sett fri igjen.

1gwL6mrUK2c

Den framståande demokratiaktivisten Joshua Wong (i svart T-skjorte) er arrestert, opplyser advokaten hans.

Foto: Kin Cheung / AP

– Eg er trygg no, skriv Wong i ei tekstmelding til nyheitsbyrået DPA.

Wong blei sikta for å ha deltatt i ein demonstrasjon hausten 2019. Han er også sikta for å ha brote eit forbod mot tildekking av andletet under demonstrasjonen.

Folk i Hongkong kan fengslast i opp til seks månader dersom dei dekkjer til andletet med skjerf eller masker under demonstrasjonar.

Wong blei arrestert saman med den 74 år gamle aktivisten Soo Sze-yiu frå gruppa League of Social Democrats.

Laster Twitter-innhold

– Trakassering

Hongkongkomiteen i Noreg fordømmer arrestasjonane torsdag. I ei pressemelding skriv komiteen at protestane 5. oktober 2019 var spontane, med fleire tusen deltakarar, spreidde over mange stader i byen.

– Den selektive arrestasjonen av to opposisjonelle som protesterte fredeleg mot den nye lova kan ikkje forståast på nokon annan måte enn som ei trakassering av profilerte menneskerettsforkjemparar i byen, heiter det i pressemeldinga.

Hong Kong Protests Joshua Wong

Joshua Wong er blitt arrestert ei rekkje gonger for å leie protestaksjonar retta mot den Kina-vennlege administrasjonen i Hongkong. Biletet er frå 27 juni 2017.

Foto: Vincent Yu / AP

Fordømde leiinga

23 år gamle Wong er ein av dei mest profilerte demokratiaktivistane i Hongkong. Saman med mellom andre Nathan Law stod han bak demokratigruppa Demosisto.

Dei trekte seg straks frå gruppa etter at ei ny omstridd sikkerheitslov tok til å gjelde i Hongkong i juni.

I oktober i fjor fordømde Wong leiinga i Hongkong etter at han blei nekta å stille til lokalval. Valkommisjonen hadde då informert Wong om at nominasjonen hans er funnen «ugyldig».

– Eg fordømmer på det sterkaste styresmaktene for å drive politisk sortering og sensur og for å ta frå meg dei politiske rettane mine, skreiv han i ei kunngjering på Facebook-sida si.

Frontfigur

Wong stod i spissen for massedemonstrasjonane hausten 2014, då fleire sentrumsgater i Hongkong blei okkuperte i to–tre månader.

Den såkalla paraplyrørsla protesterte mot endringar av valsystemet som ville gi det kinesiske kommunistpartiet auka innverknad over kven som skulle styre byen.

I 2018 blei Wong dømt til tre månaders fengsel. Dommen blei seinare redusert til to månaders fengsel fordi han berre var tenåring då han blei arrestert i 2014.

Wong anka, men tapte ankesaka. Dermed måtte han inn til soning i Lai Chi Kok-fengselet. Då han blei sett fri, slutta han seg til demonstrantane.

SISTE NYTT

Siste nytt