Dette var Diana Nyad sitt femte forsøk på å greie den 177 kilometer lange turen. Ho starta frå den kubanske hovudstaden Havana sist laurdag, og i kveld norsk tid nådde ho altså i Key West. Ho brukte 53 timar på turen.
Ho vart møtt av jublande menneske då ho kom i land, og det var stort oppbod av familie, vener, tilhengjarar, fotografar og journalistar.
– Eg har ein bodskap i tre punkt. Ein er at vi aldri skal gi opp. To er at vi aldri blir for gamle til å jakte på draumane våre. Tre er at dette ser ut til å vere ein soloprestasjon, men det er faktisk eit lagarbeid, sa ho til dei frammøtte på stranda, før ho vart lagd på ei båre og teken bort til medisinsk undersøking.
Utsliten og solbrend
Alle som tidlegare har symt denne ruta, i eit farvatn med både sterk sol, brennmanetar og hai, har brukt å ha eit bur til vern mot haiangrep.
Med ein gong ho kom på land vart ho lagd på ei båre, der ho fekk medisinsk hjelp. Seinare vart ho teken til eit sjukehus i området for ein grundig sjekk.
– Dette har eg drøymt om heile livet, og eg er veldig glad for å ha kome fram, sa den 64 år gamle langdistansesymjaren under ein kort pause ved følgjebåten nokre kilometer før ho nådde land. Ho snakka utydeleg, blir det opplyst.
Dramatisk symjetur
Turen vart meir dramatisk enn ho hadde rekna med. Ho har symt gjennom storm, vanskelege straumar og klasar med brennmanetar. Ho hadde på seg ei silikonmaske for å verne seg nettopp mot brennmanetar, men denne gjorde at ho fekk sår inne i munnen.
Legane som var med i følgjebåten seier at dette var årsaka til at ho snakka utydeleg.
Diana Nyad har prøvd å krysse strekninga Havana-Key West tre gonger i 2011 og 2012, og før det i 1978. No har ho endeleg nådd målet sitt.
Sumde rundt Manhattan
Ho har vore langdistansesymjar i over 40 år. Ho vart først kjend i 1975 då ho sumde dei 45 kilometrane rundt Manhattan i New York på litt under åtte timar. I 1979 sumde ho den 164 kilometer lange strekninga frå Bahamas til Juno Beach i Florida på 27,5 timar.
Juan Manuel Diaz Esrich, som har kjent Diana Nyad i mange år, seier dette:
– Meir enn den sportslege prestasjonen, er ynsket hennar å sende ein bodskap om fred og venskap mellom det kubanske- og det amerikanske folk.
Han legg til at ho også er utstyrt med ein enorm energi, ho er sterk fysisk og psykisk, og har ein vilje av stål.
LES OGSÅ:
LES OGSÅ:
LES OGSÅ: