Det er 8. mars, og det skal feirast.
Rekrutteringskontoret til hæren i Russlands fjerde største by, Jekaterinburg, bestilte ein eigen biletserie i høve kvinnedagen.
Men i staden for å be nokre av dei 45.000 kvinnene som jobbar i det russiske militæret om å stille, henta kontoret – ifølge nyheitsbyrået AP – inn ballerinaer. Som poserer med mannlege soldatar i full utrusting.
Lang veg å gå
For mange understrekar biletserien noko anna enn det som sikkert var intensjonen. For sjølv om det er kvinner i framskotne posisjonar i det russiske samfunnet, som sjefen i sentralbanken, har Russland ein lang veg å gå, ifølge kvinneaktivistar.
– I vesten er det samhald mellom kvinner og dei forstår at kvinner står sterkare når dei står saman, seier advokat Alyona Popova til AP.
– Men her i Russland, etter Sovjetunionens fall, er mentaliteten at alle er på eiga hand. Og sidan alle skal tenke primært på seg sjølve, står alle aleine, seier ho.
Vald i heimen
8. mars er fridag i Russland. President Vladimir Putin held ein tale som priser kvinnene på kvinnedagen. Men mykje er galt, ifølge aktivistane. I 2017 vedtok det russiske parlamentet å avkriminalisere vald i heimen dersom valden ikkje gav store fysiske skader.
Popova meiner dette var eit steg i feil retning, og førebur no eit utkast til ein ny lov som igjen kriminaliserer vald i nære relasjonar.
Kvinnene har sjølv eit ansvar
Zalina Marshenkulova, ein 32 år gamal feminist og forfattar, meiner det i Russland ikkje er noko reell forståing for kva seksuell trakassering av kvinner er.
– Kvinnene sjølv tenker dessverre ofte; kva meiner du, kva er poenget med min eksistens dersom ikkje mennene gjer tilnærmelsar, seier ho.
Ifølge aktivistane er spørsmål som lik løn for likt arbeid nesten fråverande i russisk debatt, men dei meiner det er håp. Alyona Popova set sin lit til den yngre generasjonen som hentar informasjon via nettet.
– Vi kan slå fast at den yngre generasjonen har ei større forståing. Vi veit ikkje korleis framtida vil bli, men denne generasjonen har dette i blodet på ein heilt annan måte, seier ho til AP.
Gratulasjonshelsing
Enn so lenge heiter det følgande i gratulasjonstelegrammet frå hærens rekrutteringskontor i Jekaterinburg:
«Mennenes styrke ligg i kvinnenes ømhet og kjærleik».