Ignazio Cutro (44) var den modige forretningsdrivande i byen Agrigento på Sicilia, som stod opp mot mafiaen og nekta å betale pengar til dei for å få vere i fred. Åtte mafiamedlemer vart arresterte etter at Cutro fortalde det han visste til politiet.
Kamp mot mafiaen
Han var med på å stifte oroganisasjsonen «Libere Terre» (Fritt Land), som har arbeidd for å få forretningsdrivande til å seie nei til mafiaen sitt krav om å betale pengar for å få vere i fred.
Etter ti år med terrorisering, boikott , drapstruslar og til slutt konkurs, greier han ikkje meir. Mafiaen har endeleg slått fast kven som har makta i dette området av Italia.
Veldig få torer å setje seg opp mot dei mektige mafiagruppene, og no får også Ignazio Cutro betale prisen for å ikkje godta dei kriminelle sine vilkår. Han er slått konkurs.
Han har bede styresmaktene om hjelp til å halde fram, men han har snakka til døve øyrer.
Fekk ikkje hjelp
- Eg har blitt ruinert av mafiaen, og styresmaktene har overlate meg til meg sjølv ved å avvise alle bønene mine om hjelp, seier ein dessilusjonert Ignazio Cutro.
Han seier vidare at han kjenner seg verdilaus, takka vere både mafiaen og styresmaktene.
- Eg har berre ein ting igjen å gjere, å selje organa mine. Eg startar med ei nyre. Om nokon skulle vere interessert er det berre å sende meg ein epost, seier han til fleire italienske aviser i dag.
