General: – Vi er så forsiktige som vi kan vere i Jemen

General Ahmed Asiri fortel til NRK, at hæren no står ved utkanten av hovudstaden Sanaa. Houthi-militsen vil snart lide nederlag.

– Vi er så forsiktige som vi kan vere, og vi tek oss god tid for å hindre at sivile liv går tapt, seier Asiri.

Saudi-Arabia er der for å hjelpe folket i Jemen, fortel han.

• SJÅ: General Ahmed Asiri i URIX
• SJÅ: Tidlegare ambassadør Wibye meiner Asiri er lite truverdig

Krevjande krigføring i eit fattig land

Men kritikarane skuldar Saudi-Arabia for å skape ei humanitær krise, og med vilje å drepe sivile.

• LES: FN fryktar sultkatastrofe i Jemen

I oktober i fjor vart ei gravferd bomba. 140 vart drepne over 600 såra.

Dette var gravferda til ein prominent Houthi, og Human Rights Watch kalla det eit krigsbrotsverk.

Totalt 10.000 menneske er drepne i den to år lange borgarkrigen.

– Bomber skular

Gunvor Knag Fylkesnes i Redd barna seier til NRK Urix at Saudi-Arabia bombar sjukehus, skular og nabolag.

– Det ser ikkje ut til at dei tek omsyn til internasjonal humanitær rett, og reglar i krig, seier ho.

General Asiri hevdar at Houthi-militsen dekker seg bak dei sivile.

– Militsen gøymer seg på skular og på sjukehus og i heimar, der avfyrer dei Scud-rakettar.

– Kirurgisk presisjon

Koalisjonen har vore med å trene opp ein hær, og frå frå lufta gjev dei sokalla «close air support.»

– Det betyr at du gjev luftstøtte til soldatane på bakken. Vi driv ikkje med teppebombing som i Stalingrad eller Berlin, fortel han.

Men bombinga av eit sjukehus drive av Leger utan grenser, vart fordømt av det amerikanske utanriksdepartementet i fjor.

Har de også personell på bakken, som siktar seg inn på mål med laser?

– Eg trur ikkje det er så lurt å avsløre dette til Houthiane. Men vi gjer det som er nødvendig for å hindre tap av menneskeliv i bustadstrøk, fortel Asiri.

Reuters skriv at USA deler etteretning og satelittbilder med Saudi-Arabia for målstyring.

Ingen politiske løysing i sikte

Saudi-Arabias store rival i regionen, Iran, blir skulda for å støtte den sjimamuslimske militsen militært og politisk. Dette gjer diplomatiet komplisert og betent.

Ein annan bremsekloss er den gamle presidenten Ali Abdullah Saleh.

Saleh, som var president sidan 1978, trakk seg motvillig i 2012 (sjå faktaboks), men har alliert seg med sine tidlegare erkefiendar Houthiane.

General Asiri samanliknar Saleh med diktatorar som Saddam Hussein og Moammar Gaddafi.

– I dag ligg Saleh i dekning, som alle desse diktatorane, vil han måtte stå til rette for brotsverka sine mot folket i Jemen, seier Asiri til NRK.