Fryktar at millionar kan døy i det stille

Ho held den vesle, tynne kroppen i armane sine. Sahra Muse prøver alt ho kan å trøyste sonen, men orda og songen kan ikkje mette.

Nyheitsbyrået AP har møtt henne i ein flyktningleir utanfor Mogadishu. Dei kjem frå eit område i Somalia som er kontrollert av ekstremistgruppa al-Shabab. Uroa og mangelen på mat gav den vesle familien lite anna val enn å flykte.

• Har mistet to barn i sult – frykter for det tredje

Tørke og konflikt

Den ekstreme tørka rundt Tsjad-sjøen, i Aust-Afrika og i Jemen, gjer at fleire millionar menneske kan kome til svelte i hel om dei ikkje får hjelp.

FN har lenge åtvara mot ei massiv svoltkatastrofe, og seier at dette kan bli den verste katastrofen sidan 1945.

– Vi er sterkt uroa for situasjonen, og deler denne uroa med mange, seier Tove Wang, generalsekretær i Redd Barna.

Saman med ti andre norske hjelpeorganisasjonar vil dei gjere folk merksame på det som no er i ferd med å skje. Men dei har ikkje mykje tid på seg.

Ifølgje FN risikerer over 20 millionar menneske i nord-Nigeria, Sør-Sudan, Somalia og Jemen å bli råka av hungersnaud før september.

• Ett barn dør hvert tiende minutt

Underernærte barn

Norske hjelpeorganisasjonar jobbar i fleire av landa som er råka. I ein liten landsby utanfor Burao i Somaliland har Redd Barna treft Asha, som fortel følgjande:

– Det er fleire dagar i veka at eg ikkje kan gje barna mine mat, seier åttebarnsmora.

Jorda er knusktørr, og det er nær umogleg å dyrke mat. Store deler av buskapen deira har allereie døydd. Av dei 400 geitene dei hadde er det berre 20 igjen. Asha kjenner seg hjelpelaus.

– Eg føler at ingen bryr seg, og at vi er utan verdi.

Vil bryte stilla

– Dette er katastrofar som kjem sakte, og dei gir ikkje mykje lyd frå seg, seier Wang.

Med ein felles kampanje ønskjer organisasjonane å bryte stilla rundt dei sakte humanitære krisene.

– I motsetnad til jordskjelv og tsunamiar, får ikkje slike katastrofar alle auge retta mot seg. Derfor vert heller ikkje nok ressursar sette inn for å hjelpe, seier Gry Larsen, generalsekretær i CARE.

• Er det noen sultne barn her?

Førebygging

– Slike sveltekatastrofar har kome med jamne mellomrom, men ein hadde gjerne trudd at ein i 2017 hadde kome lenger, der folk ikkje døyr av svolt, seier Wang.

Men fleire menneske vert råka av konflikt og klimaendringar, og behova for naudhjelp blir større.

– Naudhjelp kan ikkje løyse konfliktar eller bremse klimaendringar, men den reddar liv, slår Larsen fast.

Både ho og Wang er samde om at det hastar å få hjelp til desse områda, og at det er viktig å setje inn ressursar så tidleg som mogleg.

– Det er ganske lett å førebygge underernæring så lenge ein kan gi ut mat. Der er derimot veldig krevjande å behandle eit barn som er sterkt underernært, og som gjerne har andre sjukdommar i tillegg, seier Wang.