Årsaka til at Santos no stansar forhandlingane, er at ELN ikkje har gått med på setje fri gisselen Odin Sanchez, ein tidlegare parlamentsmedlem. Ved 22-tida norsk tid kjem det likevel meldingar om at det «er starta førebuingar til at gisselen kan setjast fri».
ELN skal ha lova å setje fri alle gislar før fredsforhandlingane offisielt skulle starte i dag, og det er uklart kva som gjer at dei ikkje har gjort det. Også FARC sette fri alle gislane dei heldt før forhandlingane med regjeringa starta i 2012.
Nest størst
ELN, Den nasjonale frigjeringshæren, er den nest største geriljaorganisasjonen i Colombia, etter FARC. Juan Manuel Santos vart tidelt Nobels fredspris for å ha forhandla fram ein fredsavtale med FARC, Dei væpna revolusjonære styrkane i Colombia.
Militært er ELN ein langt mindre trussel enn det FARC har vore, men har truleg rundt 2500 menn og kvinner under våpen
Santos fekk prisen, trass i at det colombianske folket sa nei til avtale i ei folkerøysting berre nokre få dagar før offentleggjeringa av fredsprisen for 2016.
Alt var klart for fredsforhandlingane mellom ELN og colombianske styresmakter, men samtalane er utsette.
Foto: RODRIGO BUENDIA / AfpJuan Manuel Santos offentleggjorde utsetjinga av samtalane kort tid før partane skulle ha det første offisielle møtet i hovudstaden Quito klokka 22 norsk tid. ELN-geriljaen sitt forhandlingsteam er på plass i hovudstaden.
Norsk tilrettelegging
– Forhandlingane kan ikkje starte i dag. Vi kan starte forhandlingane fredag eller laurdag, men vi må vere sikre på at Odin Sanchez er sett pris, sa Santos blant anna tidlegare i kveld.
Noreg er eitt av fleire land som har vore med og lagt til retten for samtalane mellom colombianske styresmakter og ELN. Noreg var også ein aktiv tilretteleggjar i forhandlingane med FARC.
Det har vore hemmelege samtalar mellom dei to partane i over to år
Konflikten med geriljaen har kosta over 260.000 menneskeliv i Colombia sidan både FARC og ELN vart etablert i 1964. Begge geriljagruppene er venstreorienterte, og begge har tydd til narkotikahandel og gisseltaking for å skaffe seg inntekter.
