Ifølgje shippingavisa Tradewinds blei det avfyrt panserverngranatar (RPG) mot skipet då det var i nærleiken av Oman.
Piratane opna eld mot Front Warrior frå to lettbåtar. Dagens Næringsliv skriv at Frontline-skipet var på veg til Sudan då piratane slo til.
Skadeomfanget på mannskapet om bord og på skipet er førebels ikkje kjent. Besetninga var ifølgje DN.no frå Russland og Filippinane.
– Dette er ein veldig alvorleg situasjon. Vi har no angrep i heile det indiske hav, som er riksveg ein i verdshandelen, seier Sturla Henriksen, administrerande direktør i Noregs Rederiforbund, til TV 2.
Herjar til sjøs
Den internasjonale skipstrafikken har i fleire år vore herja av piratar som opererer i Adenbukta utanfor kysten av Afrikas horn.
Piratar greidde å kapra 47 skip i løpet av dei ti første månadene i fjor, viser tal frå den Internasjonale Maritime Organisasjon (IMO).
Dei krev stadig meir lausepengar for å setja fri skip og mannskap.
Vil senda norsk fregatt
Dette er andre gang at eit Frontline-skip vert utsett for eit angrep av somaliske piratar.
I november i fjor tok piratar seg om bord i skipet Front Alfa i Adenbukta. Dei lukkast ikkje med å ta kontroll over skipet.
- LES OGSÅ: Norsk skip kapret utenfor Tanzania
Den norske fregatten KNM Fridtjof Nansen var i perioden august 2009 fram til januar 2010 i farvatnet utanfor Somalia for å bistå EU-styrken i kampen mot sjørøveri.
Regjeringa planlegg no å senda ein ny fregatt til Adenbukta.