NRK Meny
Normal

Frankrike i gang med å bombe IS

Franske fly har gjennomført dei første angrepa mot IS-opprørarar i Irak. Det opplyser president François Hollande sitt kontor fredag formiddag.

IRAQ-SYRIA-FRANCE-RAFALE-CONFLICT

Det er franske fly av denne typen, Rafale-jagarfly, som er sette inn i kampen mot IS.

Foto: - / Afp

France Iraq

President i Frankrike, François Hollande, gav i går grønt lys for franske angrep mot islamistgruppa IS.

Foto: Christophe Ena / Ap

Målet for angrepa skal ha vore IS-mål nordaust i Irak, og måla skal ha blitt totaløydelagde. Det er varsla fleire angrep i dagane som kjem.

Kartlegger områda

Det var i går Hollande stadfesta at Frankrike sluttar seg til USAs luftkrig mot ekstremistane i Den islamske staten (IS).

- Eg har bestemt meg for å svare positivt på førespurnaden frå irakiske styresmakter om å gi luftstøtte, sa François Hollande.

Det skulle altså berre ta ein dag før angrepa var sette i gang.

Frankrike har dei siste dagane flydd over Nord-Irak for å kartlegge området, og for å vite betre kva mål som er aktuelle å angripe.

Stor internasjonal mobilisering

Pernille Rieker

Pernille Rieker, seniorforskar ved NUPI, trur Frankrike ønskjer å bidra i Irak for å vise fram si militære styrke.

Foto: NUPI

Hollande har sagt det ikkje er aktuelt med fransk militær aktivitet i Syria.

– Me kjem ikkje til å gå lengre enn dette. Det kjem ikkje til å bli nokre bakkestyrkar, og me kjem berre til å gripe inn i Irak, slo president Hollande fast.

Tidlegare har USA angripe fleire mål i Nord-Irak, for å hjelpe dei kurdiske og irakiske styrkane som kjempar mot IS. Det er no ei større internasjonal mobilisering under planlegging, og 40 land er utfordra av USA til å bidra.

Noreg kunngjorde i går at Forsvaret sender fem stabsoffiserar for å bidra til opplæring av irakisk personell.

Seniorforskar ved NUPI, Pernille Rieker, trur Frankrike vel å bidra med flyangrep fordi dei har eit ønskje om å vise styrke.

– Frankrike er opptekne av internasjonal prestisje. Det er mykje snakk om at Tyskland har teke over leiarrolla i Europa. Frankrike er Europas militærmakt, og her kan dei vise styrke, seier Rieker.

Viktig for USÅ å få støtte

Ho viser også til at Frankrike lenge har vore opptekne av å kjempe mot internasjonal terrorisme, og landet har tidlegare vore særs sentrale i Vest-Afrika der dei har kjempa mot terroristgrupper i Sahel-regionen.

Rieker meiner det også er viktig for USA at Frankrike no bidreg.

– Det er viktig for USA at også andre land støtter opp om koallisjonen. Mange arabiske land ønskjer ikkje å vere del av ein koallisjon som berre er støtta av USA, seier Rieker.

Sjølv om det er president Hollande som står i fronten trur ikkje Rieker at det er han som er den avgjerande faktoren her, men at det er Frankrike som nasjon som er villige til å bidra.

– Eg trur ikkje ein annan president ville velt noko anna. Tradisjonelt har det vore stor eining om fransk forsvars- og utanrikspolitikk. Nokon kritikarar seier det vil koste mykje pengar, og i ei økonomisk krisetid kan det vere problematisk, men det kan også hjelpe Hollande som slit på meiningsmålingane, seier Rieker.

Pernille Rieker kommenterer
Laster innhold, vennligst vent..
Laster innhold, vennligst vent..

SISTE NYTT

Siste nytt