Flystyrten skjedde nord for den sørafrikanske hovudstaden Pretoria.
Flyet styrta fem kilometer aust for flyplassen, og trefte ei fabrikkbygning. To personar i bygninga vart skadd.
– Flyet hadde 19 passasjerar om bord, inkludert piloten og ingeniøren, seier talsmann for naudetatane, Johan Pieterse, til nyheitsbyrået AFP.
Den omkomne vart funnen i cockpiten, men det er førebels ukjent om det var piloten eller ingeniøren som omkom.
– Vi har kring 20 pasientar med alt frå små til kritiske skader, seier Pieterse.
Skulle stillast ut på museum i Nederland
Flyet utførte ein testflytur frå ein liten flyplass i hovudstaden då ulukka inntrefte. Flyet er eit Convair-fly bygd i 1954.
Den siste tida har det blitt renovert, og skulle etter planen stillast ut på Aviodrome air museum nær Lelystad i Nederland, melder AFP.
– Vi er sjokkert over at Convair-flyet, som snart skulle komme til Aviodrome, krasja under ei testflyging i Sør-Afrika, skriv Aviodrome på sine Facebooksider.
Convair-flyet, med logoen «Martin's Air Charter», var eit USA-produsert passasjerfly med plass til 44 passasjerar.