Fleire drepne og skadde etter knivangrep på tog i Tyskland

Angrepet skal ha skjedd like før klokka 15 onsdag ettermiddag.

RTL melder om både drepne og skadde personar etter angrepet, som skjedde då toget kom til den vesle stasjonen Brokstedt. Også gjerningsmannen skal ha blitt skadd i angrepet.

– Ein reisande gjekk til angrep med kniv på regiontoget mellom Kiel og Hamburg. Minst fem personar er skadde og to er drepne, seier føderalt politi til Bild.

I tillegg skal ein annan person vere i livsfare, skriv avisa.

Opplysningane om dei drepne blir også stadfesta av innanriksministeren i Schleswig-Holstein, Sabine Süttelin-Waack, overfor nyheitsbyrået DPA.

Sendt til sjukehus

Politiet og naudetatane var raskt på staden, og stengde av eit større område. Gjerningsmannen blei gripen etter kort tid på togstasjonen. Han blei sendt til sjukehus, og blir vakta av politiet der.

Identiteten til gjerningsmannen og ofra er ikkje stadfesta, skriv Bild. Det er heller ikkje mogeleg å seie alderen til gjerningsmannen fordi identifikasjonspapira hans var dekt i blod, skriv avisa.

Ein talsperson for politiet seier at mannen truleg er mellom 20 og 30 år, ifølge RTL.

Det er førebels ikkje kjent kva motivet for handlinga var.

Deutsche Bahn melder på Twitter at toga som skulle gått på jernbanestrekninga mellom dei to byane innstilt onsdag kveld. Brokstedt stasjon er også stengt.