Fakturaen på 15,95 pund var velgjort, og ikkje noko ein femåring vanlegvis får.
Foto: BBCEin ordentleg faktura, på 15 pund og 95 pence, var det som venta fem år gamle Alex Nash frå Cornwall i Sør-England, etter at han droppa å møte opp i ein bursdag, og heller ikkje melde frå om at han ikkje kom. Det er BBC som først omtalte historia.
Foreldra har no fått beskjed om at saka kan hamne i ein lokal rett for småsaker om dei ikkje betaler fakturaen. Det meiner Alex sin far er urimeleg.
– Eg kan forstå at ho er opprørt fordi ho har tapt pengar, men pengane er ikkje det sentrale her. Det er måten ho har prøvd å få pengane frå meg som er saka her, seier Derek Nash.
Foreldra til Alex hadde først takka ja til å kome i bursdagen som fann stad i ein innandørs alpinbakke rett før jul. Men då dei forstod at sonen var dobbeltbooka og hadde ein avtale med besteforeldra sine, falt valet på å halde avtalen med dei eldre, og droppe bursdagen.
Alex Nash hamna i midten av ein ufrivillig klinsj, då han var med besteforeldra sine, i staden for å gå i bursdag.
Foto: BBCForeldra til Alex seier dei ikkje hadde noko kontaktinformasjon til bursdagsarrangøren, småbarnsmor Julie Lawrence, slik at dei kunne gi beskjed til ho.
Det nektar derimot Lawrence for, som i ein kort kommentar til BBC seier at alle kontaktdetaljar stod på invitasjonen.
No kan altså den kjipe saka og faktura nummer 1432 hamne i ein lokal rettssal, sidan far Nash nektar å betale for sonens bursdagsskulking.
