'Ndrangheta sine inntekter i fjor utgjer 2,9 prosent av brutto nasjonalprodukt i Italia, opplyser forskargruppa Eurispes.
Leiaren for Eurispes, Gian Maria Fara, seier at tala er alarmerande. Han fortel at det er narkotikatrafikken som er viktigaste inntektskjelda til mafiagruppa, som har hovudbasen sin i Calibria heilt sør på det italienske fastlandet.
Narkotika viktigast
Eurispi har rekna ut at 'Ndrangheta i fjor tente 27,2 millionar euro, rundt 217 millionar kroner, berre på narkotika. Dette er rundt 62 prosent av dei samla inntektene til det kriminelle syndikatet.
Den kalibriske mafiagruppa er ei av dei tre store mafiagruppene i Italia. Dei to andre er Cosa Nostra på Sicilia og La Comorra, som har hovudsetet sitt i Napoli-området.
Fleire mafia-ekspertar i Italia meiner no at 'Ndrangetha no er mektigare enn La Comorra. Det italienske kriminalpolitiet DIA slo alt i 2006 fast at organisasjonen sine medlemer opptrer meir omsynslaust enn dei to andre gruppene.
Den indre justisen i mafiagruppa skal vere så hard at det er svært vanskeleg for politiet å greie å rekruttere informantar internt i organisasjonen.
Ekspansjon
'Ndrangheta har dei siste åra ekspandert til dei fleste land i Europa, pluss i Sør-Amerika, Canada og Australia. Det er etniske italienarar i desse områda som er bindeleddet til gruppa, opplyser italiensk politi.
Drapa på seks personar utanfor ein pizzarestaurant i den tyske byen Duisburg i august i fjor sende sjokkbølgjer gjennom heile Europa. Politiet trur drapa var eit resultat av ein intern feide i 'Ndrangheta.
Den italienske antimafia-kommisjonen har samanlikna den kalabriske mafiaen med ei internasjonal hurtigmatkjede.
Dei har den same gjenkjennelege merkevara og eit identisk kriminelt produkt over heile verda, heiter det i ein rapport frå kommisjonen.