Å sette fri fangane skal bidra til å «utvide det demokratiske rommet for alle», seier statsminister Hailemariam Desalegn.
Han lovar at dei som er dømde kjem til å bli benåda og sette fri, medan skuldingane mot dei som ventar på dom kjem til å falle bort.
Nøyaktig når fangane vert sette fri, eller kor mange det er snakk om, har ikkje Desalegn sagt noko om, anna enn at det er sett i gong ein prosess.
Fråsegna kom under avslutninga på eit 18 dagar langt regjeringsmøte, og vart gitt medan leiarane for dei fire politiske partia som deltek i regjeringskoalisjonen, var til stades.
Fengsel blir museum
Desalegn skal også ha gitt ordre om å stenge det omstridde Maekelawi-fengselet, og han sa at dette skal bli om til eit museum.
Fengselet er berykta for å torturere fangane, skriv organisasjonen Human Rights Watch. Regjeringa hevdar påstandane ikkje er sanne.
– Dette kan signalisere slutten av ein epoke med blodig undertrykking i Etiopia, seier Fisseha Tekle ved Amnesty International.
Sjølv om det er gode nyheiter at fengselet vert stengt, ber Tekle om at ein ikkje må gløyme det som har skjedd der.
– I ei årrekkje har Maekelawi fungert som eit torturkammer, som har blitt brukt av etiopiske styresmakter til å brutalt avhøyre dei som har gjort motstand mot regjeringa, seier Tekle.
Langvarig uro
Lovnaden frå statsministeren kjem etter fleire månader med demonstrasjonar mot regjeringa i dei urolege regionane Oromia og Amhara.
Ifølgje Human Rights Watch har fleire hundre menneske mista livet i samanstøyt mellom dei to største folkegruppene i landet.
Styresmaktene har svart med å innføre unntakstilstand, og sidan 2016 er fleire tusen menneske arresterte, ifølgje menneskerettsgrupper. Blant desse er også mange regimekritikarar og journalistar.
Ein av dei som var tidleg ute og kommentere nyheita frå statsministeren er den kjende bloggaren og tidlegare fangen Befeqadu Hailu.
– Alle desse løfta må bli innfridd snart, skriv Hailu på Twitter.