Brasil: – Ikkje drikk av flaumvatnet

Myndigheitene i Brasil fryktar at ein epidemi kan bryte ut i landet, om folk ikkje får i seg reint vatn.

Dei prøvar å hindre folk som ikkje har nok drikkevatn til ikkje å ty til regnvatnet som har samla seg.

I tillegg ønskjer dei at både innbyggjarane i dei flaumråka områda og redningsarbeidarane vaksinerer seg mot stivkrampe og difteri.

Fryktar fleire omkomne

702 er no stadfesta omkomne etter flaumen som førte til mange jordskred i områda rundt Rio de Janeiro.

Verst har det gått ut over områda nord for Rio de Janeiro. I Nova Friburgo er 335 omkomne, og i Tersepolis er dødstala så langt 285, ifølgje den brasilianske fjernsynskanalen Globo.

• Les: Reddet etter 16 timer i gjørma

Men myndigheitene trur at fleire vil bli funne omkomne dei komande dagane. Lokale aviser melder om at minst 100 personar framleis er sakna. I tillegg er mange hundre i fare for å bli tekne av nye jordskred, skriv nyheitsbyrået Reuters.

– Vi rådar folk som bur i dei høgastliggande områda til å forlate heimane sine, seier Rubens Placido i brannvesenet i Nova Freiburgo.

– Der er folk som ikkje vil reise, så vi sjekkar om vi kan få domstolane på vår side, slik at vi kan tvinge dei ut med politihjelp, seier han.

Sju tonn medisin

I snart ei veke har militærhelikopter frakta ut forsyningar og drive redningsarbeid i område som er avstengde etter dei mange skreda som vart utløyste av eit kraftig regnvêr.

Ifølgje myndigheitene er det allereie frakta ut 8000 matpakkar og sju tonn med medisin og anna utstyr.

Telt er på veg til områda for å gi tak over hovudet til dei 13.400 som har mista heimane sine eller har vore nøydde å forlate dei på grunn av flaumen.

Helikopterpilotar fortel at arbeidet slett ikkje er lett. Området er fullt av fjelltoppar og kraftlinjer, og det er få trygge landingsplassar der.

– Eg har aldri floge under så utfordrande tilhøve, seier piloten Adalberto Ortale til BBC.

Soldatar har også starta å sette opp mobile bruer som kan gjere det mogleg å frakte inn tyngre maskiner til ryddearbeidet.

• Les: – Det er alltid en sammenheng mellom flommer