Tala på omkomne og såra sprikar, men ifølgje det russiske krisedepartementet er 18 døde - blant dei sjåføren av lastebilen og eit lite barn.
I tillegg skal fleire titals passasjerar vera skadde. For 14 av dei er tilstanden alvorleg, opplyser helsestyresmaktene i Moskva via nyheitsbyrået Interfax.
Bussen delt i to
– Dei skadde blir frakta til lokale sjukehus med helikopter, seier talsperson for det russiske krisedepartementet, Irina Rossius til det russiske nyheitsbyrået ITAR-TASS.
30 ambulanse-crew rykte ut til ulukkesstaden.
Bussen gjekk i ordinær rute frå Podolsk til Xhokhovo i Moskva-regionen då lastebilen lasta med grus og pukk køyrde inn i den. Bussen blei delt i to som følgje av krasjet, melder nyheitsbyrået RIA Novosti.
Fleire andre køyretøy skal også ha blitt råka av ulukka.
Etterforskinga tyder så langt på at det var lastebilsjåføren som ikkje overheldt vikeplikta si då han skulle svinga ut i eit vegkryss, skriv nettavisa Russia Today.