Måndag vart ein 42 år gammal politimann knivstukken og drepen utanfor heimen sin i ein Paris-forstad.
Gjerningsmannen var naboen, den 25 år gamle Larossi Abballa.
Han tok seg så inn i heimen til politimannen og forskansa seg saman med politimannens kone og tre år gamle son.
Kona vart på eit tidspunkt drepen av Abballa.
Sende direkte på Facebook
Forskansa i leilegheita, skal Abballa ha filma det makabre gisseldramaet, og sendt det direkte på Facebook.
Fleire som påstår dei har sett filmen, seier den er rundt 13 minutt lang.
Kontoen var i falsk namn, og er no stengd ned av Facebook.
Gisselsituasjonen enda med at politiet storma leilegheita og skaut og drap gjerningsmannen.
Parets tre år gamle son kom frå det uskadd.
– EM blir ein kyrkjegard
Bilde av Larossi Abballa, teke frå Facebook.
Foto: STR / AfpEin journalist ved den franske radiokanalen RFI, David Thomson, opplyser på Twitter at han har sett videoen på Facebook.
Han seier at gjerningsmannen mellom anna skal ha sagt:
– EM kjem til å bli ein kyrkjegard, vi har svart ja til sjeik Adnani!
Namnet Adnani kjem viser truleg til Abu Muhammad al-Adnani, ein av talsmennene til den ekstreme islamistrørsla IS.
– Islamistisk terror
Den franske presidenten François Hollande, slår i dag fast at drapa var terror.
Han grunngjev dette med at både gjerningsmann og IS har bekrefta at dei var i eit slags samarbeid.
Hollande seier terrortrusselen er høg.
– Frankrike er ikkje einaste land i søkelyset, det har vi sett dei siste dagane i USA. Men Frankrike er konfrontert med ein ekstremt stor terrorfare. Alle hugsar kva som skjedde i 2015, i januar og i november, sa Hollande
Tekne inn til avhøyr
I dag vart to personar arresterte og avhøyrde i samband med saka.
Arrestasjonane vart kunngjort ved 12-tida tysdag, få timar etter at politiet og franske styresmakter kalla angrepet ei terrorhandling.
