Desse barna tek ikkje sommarferie

– Det er berre ein drope i havet. Men det er ein retur tilbake til normalen for barna som har vore gjennom krig og eksil og er i fare for å bli apatiske frå eit liv på vent, seier den syriske ingeniøren Bazel Shrayyef til AFP.

I flyktningleiren Sakramangas i utkanten av Athen jobbar 20 flyktningar som frivillige med å undervise 670 elevar mellom 6 og 13.

Hellas har planar om å gi utdanning til 8500 flyktningbarn frå september, trass i dei økonomiske utfordringane dette fører med seg for det gjeldstynga landet. 50 000 flyktningar er stranda i Hellas etter at landa på Balkan stengde grensene i vinter.

• Les også: I dag blir hver tredje skoleelev her en syrisk flyktning

Slit med konsentrasjonen

Barna i Sakramangos på lik linje med andre leirar veit ikkje kor lenge dei skal vere der før dei får reise vidare.

– Det er vanskeleg for elevane å konsentrere seg over lengre tid, vi må jobbe for å få dei til å følge med, seier Ianni Baveas, ein av dei lokale frivillige som lærer barna gresk, til AFP.

Ifølge Redd Barna har flyktningbarna i leirane i Hellas ikkje vore på skulen på eit og eit halvt år i gjennomsnitt. Meir enn ein femdel av barna i skulealder har aldri gått på skulen.

• Les også: Én av to syriske flyktningbarn går ikke på skole

Kun ein tredel av syrarar i Tyrkia går på skule

Og i transittlandet Tyrkia er naudhjelpsorganisasjonar uroa for det dei omtalar som ein tapt generasjon. Av dei nær tre millionar syriske flyktningane i landet er rundt 700 000 i skulealder, og minst to tredelar av dei får inga formell undervisning ifølge tal frå det tyrkiske utdanningsdepartementet, men talet på dei som får undervisning er aukande, skriv BBC.

Likevel går mange på midlertidige syriske skular med frivillige lærarar, ettersom kapasiteten ikkje er stor nok på dei tyrkiske skulane – i tillegg er språket ein barriere. Mange syriske barn må også arbeide for å hjelpe familien.

• Les også: Syriske Bashar (13) jobber syv dager i uka

Tyrkiske myndigheiter har på lik linje med Hellas eit mål om å få skuleplass til alle syriske flyktningbarn innan året er omme.