Frivillige frå heile verda har dei siste dagane reist til Thailand og Tham Luang-grotta der det thailandske fotballaget og trenaren deira sit fanga.
NRK sin reporter på staden har snakka fleire av dei.
– Stort sett alt vi gjer der er farleg, seier dykkaren Ivan Karadzic frå Danmark.
Han har reist ned i håp om å få redde gutane ut i live før det frykta monsunregnet kjem.
Fysisk krevjande
Danske Ivan Karadzic fortel til NRK at det mest krevjande vert å få barna ut att sidan dei ikkje er trent i dykking.
– Nokre stader er det veldig trongt, og sikta er ikkje så god, seier Karadzic.
Han har bore inn tankar i grotta for at dykkarane skal komme seg lenger inn i grotta. Ifølgje Karadzic er det ikkje mogleg å dykke heile distansen på ein person sin tank.
Gutane er fleire kilometer inne i grotta.
– Kor hardt fysisk er det?
– Sjølve dykkinga er ikkje fysisk hardt, men å komme inn til dei stadene der dykkinga byrjar, er veldig krevjande. Det er opp og ned og fleire bakkar, så det er fysisk krevjande å komme inn til vatnet, seier Karadzic.
Når dei først kjem til vatnet, går dykkinga fint, ifølgje dansken.
– Ønskjer å bidra med det eg kan
Astapon Na Nakhon gir massasje til dei utslitne hjelpearbeidarane. Ho er opphavleg frå den sørlege delen av Thailand.
– Når sør har problem kjem folk frå nord for å hjelpe. Derfor ønskjer eg å bidra med det eg kan, seier ho til NRK sin reporter.
Natt til fredag omkom ein tidlegare marinejeger då han var på veg for å frakte oksygentankar inn i grotta.
– Vi ser på gutane som vår familie
Lamduan Mayula frå det lokale sivilforsvaret, seier at det var ei sjølvfølge for henne å bidra i redningsarbeidet.
– Dette kunne like gjerne vore mine barn, derfor kom eg for å hjelpe. Vi ser på gutane som vår familie.
Den største bekymringa i redningsaksjonen av fotballaget er det uføreseielege monsunregnet som har skylt inn over Chiang Rai-provinsen, der Tham Luang-grotta ligg.
Aukande vasstand i grotta kan gjere det umogleg for gutane å dykke ut som planlagt, og hemme arbeidet med å frakte naudsynte oksygenforsyningar.
Ein av dei som jobbar med å analysere kor mykje vatn det er i grotta, er vassingeniøren Sawangtit. Ho seier til NRK at arbeidet er svært krevjande.
– Det er nesten umogleg å anslå kor mykje vatn det er, men vi er glade for å kunne bidra i hjelpearbeidet.
– Ser du på deg sjølv som ein helt?
– Nei på ingen måte, det er ei ære å kunne hjelpe til i denne redningsaksjonen.