– Eit fly av typen Canadair, med minst to menneske om bord, styrta nær landsbyen Platanisto på øya Evvia, seier Yannis Artopios, som er talsperson for redningstenesta i området til nyheitsbyrået AFP.
Canadair er eit sjøfly som landar på vatnet og syg inn fleire tusen liter vatn medan det er i fart.
Tysdag ettermiddag melder det greske forsvarsdepartementet at begge pilotane i flyet miste livet.
Styrta i åssida
Ein video publisert av greske medium viser eit fly som flyg lågt over flammane medan det slepper ut vatn. Ein liten del av høgre veng dett av når vengen streifar ned i noko, før flyet svingar mot høgre, styrtar i åssida og eksploderer.
Men det har enno ikkje komme informasjon frå offisielt hald om kva som var årsaka til styrten.
Flyet var på oppdrag i området saman med tre andre fly og rundt eitt hundre brannfolk som kjempa mot brannane på bakken.
To helikopter blei sende til staden for å delta i søk- og redningsarbeid, skriv ERT.
Det brenn kraftig i landsbyen Vati på Rodos. Brannen braut ut tysdag, og kjem i tillegg til brannane som herjar ved Lindos litt lenger nord på øya.
Foto: Petros Giannakouris / APLandsbyar trua
Den siste veka har det herja skogbrannar fleire stader i Hellas, mellom anna på øyane Rodos og Korfu. Ved byen Lindos på Rodos er seks landsbyar trua av flammane.
Det har også brote ut brann ved landsbyen Vati lenger sør på øya.
Det er sett inn ni brannfly og fire helikopter i sløkkearbeidet på Rodos. Høg temperatur og kraftig vind har gjort arbeidet svært vanskeleg.
Fleire tusen turistar er evakuerte frå øya dei siste dagane.
Berekningar viser at brannane har øydelagt skog- og landbruksområde på til saman 150 kvadratkilometer på Rodos. Det utgjer rundt 10 prosent av utmarksområda på øya.
