I Chicago vart ein 50-år gammal mann banka opp etter ei bilulukke, av ei gruppe afroamerikanarar, som roper:
– Stemde du på Trump? Ikkje stem på Trump!
Ein video frå Youtube viser at mannen blir slått og sparka, og at nokon køyrer av stad med bilen hans.
Mannen hengde på bilen eit stykke, og er no lagd inn på sjukehus, men skal ikkje ha alvorlege skadar.
Videoen er retweeta over 4.000 gangar, den er delt på Youtube og Facebook.
Lokalavisa «DNA Info» skriv at det er uvisst om mannen var Trump-tilhengar, men at afroamerikanske organisasjonar fordømmer episoden.
I ein annan episode, i California, vart ei jente banka opp etter at ho hadde ytra støtte til Trump på Instagram.
- LES:
Banka opp utanfor pizzarestaurant
Hussain Saaed Alnahdi vart banka opp utanfor ein pizzarestaurant på halloween. Han døydde på sjukehus dagen etter.
Hussain var ein av 150 utvekslingsstudentar frå Saudi-Arabia, som studerte ved Universitetet Wisconsin-Stout.
Wisconsin ligg i det sokalla rustbeltet, og Donald Trump vann overraskande delstaten.
Det er likevel usikkert om drapet kan bli knytt til stemninga som er piska opp under valkampen. Motivet er ukjent, skriv Milwaukee Journal Sentinel.
Men det blir rapportert om ei markant auke i rasistisk vald under og i kjølvatnet av presidentvalet.
Spesielt har det gått ut over muslimar, homofile og latinamerikanarar.
Hakekorset spreidd på plakatar og vegger
Det har dukka opp hakekors fleire stadar, som i Wellsville og i Philadelphia. Hakekors og Hitler-metaforar har også blitt brukt i retorikken til dei som hatar Trump.
Samtidig seier Ku Klux Klan at dei vil arrangere ein sigersparade til ære for Trump i Nord-Carolina.
Hat spreidd på toalettvegger
Mexicanarar blir bedne om å «pelle seg heim» av medelevar. Toalettvegger blir dekte med hatefulle ytringar.
Black Lives Matter aktivist Shaun King har samla nokre av dei mest graverande tilfella. Han hevdar å ha fått inn over 10.000 tips om rasisme i USA etter valet.
Fryktar auke i hatkriminalitet
Britisk kringkasting viser til at Brexit-avstemminga førte til ei 41 % auke i hatkriminalitet. Og åtvarar mot at noko liknande kan skje i USA.
Men ein må vente til FBI kjem med sin statistikk, før ein kan konkludere. Den kjem ikkje før i 2017.
Mange falske historier
I Louisiana er ei kvinne tiltalt for å ha fabrikkert ein melding til politiet om at ho vart angripen for å gå med hijab.
Fleire slike historier blir spreidde på sosiale medium og blandar seg med dei ekte.
Dette er med på å forsterke stigmatiseringa av Trump sine tilhengarar.
Undertrykt hat
Carlos Wiley ved Penn State university seier til USA Today at han trur angrepa kjem frå menneske som har undertrykt rasehatet sitt under Obama.
No føler dei det er trygt å ope vise fordommane sine.
– Folk såg korleis demonstrantar vart knuffa med under Trump sine valmøte, og dei tenkjer, dette kan vi gjere også, seier Wiley til USA Today.