Ballong-vågestykke over Atlanteren

Ballongferda starta på Robben Island, 12 kilometer utanfor kystlinja til Cape Town og enda på havet om lag 300 meter frå fastlandet.

– Eg fekk verkeleg panikk på eit tidspunkt, fordi eg prøvde å dra i tauane til ballongane men dei hadde floka seg saman. Det var som å prøva å trekkja ned 200 kilo og det var heilt umogleg, seier 37-åringen Silver-Vallance til nyheitsbyrået AP.

Inspirert av Mandela

Silver-Vallance seier han var inspirert av ekspresidenten og Nobels fredsprisvinnaren Nelson Mandela, som er verdskjent for sin uselviske kamp mot apartheid og for toleranse.

94-åringen sat 27 år som politisk fange på Robben Island og i andre fengsel for å ha forsøkt å kasta den kvite mindretalsregjeringa.

– Risikoen med dette er ørliten samanlikna med den risikoen som Mandela tok. Han visste ikkje om han nokosinne ville klara å koma seg av øya. Han gjekk ei uviss framtid i møte. Han og mange andre har gjort Sør-Afrika til eit betre land å leva i, seier Silver-Vallance til AP

– Eg fekk litt hetta

Ein viss risiko tok han likevel med å la seg frifta avgarde med ballongane.

Ifølgje Silver-Vallance sjølv har slike ballong-stunt berre blitt gjort 12 gonger tidlegare. To av gongene enda det fatalt.

Når ballongtauane vikla seg saman og han ikkje kom nær nok til å stikka hol på dei og sleppa heliumgassen ut, måtte han ty til eit anna våpen.

– Då tok eg fram ein luftpistol, men kulene spratt av, så eg fekk litt hetta. Til slutt fekk eg laus nokre av ballongane og begynte å sprekkja dei.

Etter ein god time hadde han fått hol på 35 av dei 160 ballongane og kunne landa heilskinna i ein gummibåt ute på havet.

Føremålet med vågestykket var å samla inn over 6 millionar norske kroner til Nelson Mandela barnesjukehus i Johannesburg i Sør-Afrika.

Ballongstuntet blei gjennomført berre timar før beskjeden kom om at Mandela var utskriven etter ni dagar på sjukehuset under nok ein kamp mot lungebetennelse.

.