Avverja piratåtak mot norsk skip

Alle dei sju piratane vart arresterte, opplyser sjøfartsstyresmaktene i landet, SUMATRA, og eigaren av skipet Ocean Rig, ifølgje NTB.

Åtaket mot det 228 meter lange boreskipet Ocean Rig Poseidon skjedde ved åtte-tida tysdag morgon, rundt 23 nautiske mil søraust for øya Mafia.

• LES OGSÅ: 2011 kan bli et rekordår for piratangrep

– Skaut tilbake

Sju piratar angreip skipet med skytevåpen frå ein liten båt.

– Marinesoldatar som voktar skipet og tryggingspersonell om bord svarte på åtaket med å skyta tilbake, overmanna angriparane og tok dei deretter til fange, opplyser SUMATRA.

Ocean Rig har base i Stavanger. Skipet var ute på oppdrag for det brasilianske oljeselskapet Petrobras då piratane slo til.

Hittil er 18 piratar arresterte etter åtak i tanzanianske farvatn i Det indiske havet. 2011 kan bli eit rekordår for piratåtak generelt. Så langt i år har piratåtak mot skip utanfor Somalia auka med heile 60 prosent.

• LES OGSÅ: Mot ny gullalder for somaliske piratar

Fleire væpnar seg

Men sjølv om talet på åtak aukar sterkt, er det ferre av dei som er vellukka. Ei av årsakene er at stadig fleire skip har vaktar om bord.

Den norske regjeringa gav den 1.juli i år norske rederi moglegheita til å søkja om løyve til å ha profesjonelle, væpna vaktar om bord på skipa sine.

No er kvart fjerde norskeigde skip væpna mot piratar, syner tal frå Sjøfartsdirektoratet og Norges Rederiforbund.

• LES OGSÅ: Frykter mottrekk fra piratene