Det krystalliknande stoffet vart funne i 70 øskjer i eit tregolv på eit lager i Melbourne, fortel det føderale politiet, skriv BBC. To menn er arresterte og sikta for brot på narkotikalovene.
Den totale vekta på funnet er 903 kilo.
Kunne blitt til millionar av enkeltsal på gata
BBC skriv at statsminister Malcolm Turnbull nyttar høvet til å rose politiet.
– Dette dreier seg om nesten eit tonn narkotika. Det er ein stor siger for vårt grensevern og våre politifolk som greidde å fange opp dette, seier Turnbull.
Styresmaktene seier at stoffet har sitt opphav i Asia, men dei vil ikkje røpe kvar.
Dei politiet mistenker står bak, er to menn på 53 og 36 år frå Melbourne. Politiet jaktar også på to til dei mistenker har ein finger med i spelet, ifølgje BBC.
Justisminister Michael Keenan seier at denne mengda metamfetamin kunne ha ført til millionar av enkeltsal på gata, der kvart enkelt sal kunne potensielt tatt liv, øydelagt familiar, miljø og samfunn.
– Det er ikkje tvil i at rask handtering av politiet stoppa ein tsunami av narkotika frå å treffe gatene våre med ei dødeleg effekt, sa Keenan.
Ein variant av amfetamin
Ifølgje Rustelefonen.no er metamfetamin eit stoff som er i nær kjemisk slekt med amfetamin. Verknaden er stort sett den same, ifølgje nettstaden.
Der står det at uttrykket "speed", som i dag vert brukt som eit kallenamn for alle sentralstimulerande stoff, kjem frå metamfetamin-bruk i USA. Ein spesiell variant av metamfetamin er som store, isklump-liknande krystallar, og vert kalla «ice».