Klokka seks i dag tidleg norsk tid (klokka sju lokal tid) opna vallokala i dei palestinske områda på Gazastripa og på Vestbreidda, og dei skulle halde ope i 12 timar.
Ved 16-tida gjorde den sentrale valkommisjonen det klart at opningstida i vallokala blir utvida med to timar, slik at dei stengjer først klokka 21 norsk tid.
Det er også høve til å røyste ved ein del postkontor i Aust-Jerusalem, men dei fleste av dei 120.000 røysteføre her må reise til vallokale på Vestbreidda.
Mange kvinner møtte opp tidleg for å røyste i dei palestinske områda. (Foto: AFP/Scanpix)
Det er til saman 1,8 millionar røysteføre palestinarar i dei palestinske områda.
Det var ein optimistisk PLO-leiar Mahmmoud Abbas som røysta i Ramallah på Vestbreidda tidleg i føremiddag. Han gav uttrykk for at valet førebels var svært bra avvikla, og vinka optimistisk til tlhengjarane sine då han kom til lokalet.
- Valet har hittil gått veldig bra. Frammøtet har vore oppmuntrande godt, spesielt blant palestinske kvinner. Eg håpar at valet held fram like fredeleg som det starta, sa Mahmmoud Abbas til journalistar utanfor vallokalet.
Den sentrale valkommisjonen opplyste i ettermiddag at valdeltakinga dei første feme timane var på mellom 25 og 30 prosent.
Nær 800 utanlandske observatørar er på plass, saman med fleire tusen lokale. Også 20 nroske observatørar er i sving, 15 av dei er knyutte til EUs observatørkorps på 260.
Det er hittil ikkje meldt om uro i samband med valet, men det har kome klagar frå den sørlege delen av Gaza-stripa, der israelske soldatar blir skulda for å ha hindra folk i å nå fram til vallokala.
Den einaste seriøse utfordraren til Mahmoud Abbas, menneskerettsforkjemparen Mustafa Barghouti, klaga i dag på det han kalla brot på vallovene. Han viste blant anna til ein stor annonse i den største palestinske avisa, som oppmoda folk til å røyste på Mahmoud Abbas.
Barghouti viste til at det etter vallovene ikkje var lov å drive valkamp etter den offisielle avslutninga av valkampen fredag kveld. Han krev at den sentarle valkommisjonen etterforskar det som har skjedd.
Det store spenningsmomentet ved valet blir valoppslutninga. Det var ikkje køar ved vallokala då dei opna i dag tidleg, men tilstrøyminga har vore jamn utover føremiddagen.
Israel hadde på førehand lova å gjere det lettare for palestinarar å bevege seg rundt omkring på Vestbreidda, og at ein del soldatar skulle trekkjer seg tilbake frå ein del sperringar.
Det er uklart om dette har skjedd. Fleire utanlandske journalistar som dekkjer valet opplyser at det verkar som om det er like mange vegsperringar som før.
Palestinske augevitne fortel også at militante palestinarar i føremiddag skaut minst to rakettar mot Israel frå Gaza stripa. Dette er ikkje stadfesta av israelske styresmakter.