Ho vart først arrestert i Mexico i 2007, før ho vart utlevert til USA i august i fjor. Ho vart skulda for å ha vore sentral i oppbygginga av det illgjetne Sinaloa-kartellet på 1990-talet saman med Joaqin «Shorty» Guzman, den mest ettersøkte narkobaronen i Mexico.
Avila Beltran er niesa til Miguel Angel Felix Gallardo, ein annan av toppfigurane i dei meksikanske narkokartella. Han sonar for tida ein dom på 40 års fengsel for å ha drepe ein amerikansk politimann.
Nye smuglingsruter
Avila Beltran fekk kallenamnet «Stillehavets dronning» fordi ho etablerte fleire nye smuglingsruter for narkotika langs den meksikanske stillehavskysten til California. Ho er ein av dei mest mytiske kriminelle i Mexico, og den klart mest kjende kvinnelege banditten i Mexico.
Kallenamnet er henta frå ei såkalla narkoballade, «nacocorrido», ein slags undergrunns popmusikk som er populær blant kriminelle, spesielt i narkotikamiljøa. Livet hennar som hardkokt kriminell har også vore modell for ein populær meksikansk såpeopera.
Sandra Avila Beltran har vedgått at ho kjenner mange av dei meksikanske narkobaronane, men ho nektar for å ha delteke i narkotikabrotsverk sjølv. Ho har tent pengane sine på interesser i eigedomsbransjen og i moteindustrien, seier ho.
Frikjend i meksikansk rett
Ho vart dømd til 70 månaders fengsel ved ein domstol i Florida i fjor, men vart altså deportert til Mexico City tysdag. Her vart ho straks arrestert av meksikansk politi, sikta for kvitvasking av pengar.
Kvitvaskingsaka vart suspendert då ho vart utlevert til USA, men blir altså no teken opp att. Då narkodronninga vart arrestert for første gong for seks år sidan tok politiet beslag i fleire luksusbilar, mange dyre smykke, eigedomar og 14 bankkontoar.
Ho vart frifunnen i det meksikanske rettssystemet, men vart likevel utlevert til USA. No har ho sona ferdig straffa si der, men vart straks arrestert då ho kom tilbake til heimlandet.
Rafael Caro Quintero
Dette skjer berre få dagar etter at USA reagerte sterkt på at den meksikanske narkobaronen Rafael Caro Quintero vart sett fri, etter å ha sona nesten 30 år av ein dom på 40 år for å ha gitt ordre om drapet på narkotikapolitimannen Enrique Camarena.
Avila Beltran var blant 129 meksikanarar som hadde sona i amerikanske fengsel, som vart sende tilbake til Mexico tysdag.
LES OGSÅ:
LES OGSÅ:
LES OGSÅ:
LES OGSÅ: