Det gjekk bra til slutt med Todd Goldsberry. Han fekk hjelp, og kom seg trygt i land.
To millionar menneske er utan straum i den amerikanske delstaten Florida, etter at orkanen "Katrina" har herja der siste døgnet.
Verst gjekk det ut over den folkerike sørvestkysten av Florida. Hittil er det meldt om fire omkomne etter orkanen, som nådde land like ved Fort Lauderdale seint i går kveld.
Satellittbilete av orkanen "Katrina" som no herjar Floridakysten. (Foto: AFP/Scanpix)
I løpet av nokre timar kom det 30,5 centimeter med regn, og kombinert med kraftig vind i opptil 120 kilometer i timen, gjekk det hardt ut over vegetasjonen.
Ein person omkom då fallande tre sleit av ein kraftleidning, som landa på bilen hans. To personar fekk fallande tre over seg, og den fjerde omkom då bilen hans køyrde inn i eit tre som hadde falle over vegen.
No er orkanen nedjustert til ein tropisk storm, og er på veg inn i Mexicogolfen. Det er venta at "Katrina" vil få orkans styrke igjen når ho igjen når land.
Direktør Max Mayfield ved Det amerikanske orkansenteret seier at det varme vatnet i Mexicogolfen kan føre til et "Katrina" blir endå kraftigare når ho kjem inn mot land igjen i Panhandle-området i Florida i løpet av dagen.
"Katrina" er den 11. orkanen som har råka Florida sidan starten på orkansesongen i juni, noko som er rekordmange så tidleg i sesongen. Orkansesongen tek vanlegvis ikkje slutt før i november.
"Katrina" skapte også store problem i Miami Beach. (Foto: Reuters/Scanpix)