– Det er ingen problem med tryggleiken i Tunisia. Alt er under kontroll, sa ministeren for turisme, Selma Elluni Rekik, til nyheitsbyrået ANSA i går.
I dag smalt det. 22 menneske vart drepne, 17 av dei turistar, då to væpna menn angreip Bardomuseet i Tunisias hovudstad Tunis. Mennene skaut også mot turistbussar som stod utanfor museet.
Dette er ein av fleire bussar som vart skotne mot av dei to terroristane som i dag gjekk til angrep mot eit museum i Tunis.
Foto: ZOUBEIR SOUISSI / ReutersSatsar på golf, sjø og ørken
Det var situasjonen i nabolandet Libya som var bakgrunnen for spørsmålet om tryggleiken i Tunisia. Ministeren var einig i at anarkiet og kaoset som regjerer i Libya ikkje akkurat hjelper Tunisia, men at alt likevel er trygt.
– Me må gi tryggleik til utanlandske entreprenørar som vil investere i Tunisia, sa ministeren, og sa at det ikkje berre er turismen dei er uroa for, men også økonomien.
- LES OGSÅ:
Ho fortalde vidare om korleis Tunisia vil satse på å få meir turisme i innlandet, og ikkje berre langs kysten. At turar i Sahara, golfferiar og thalassoterapi (behandling av sjukdommar ved hjelp av sjøvatn journ.anm.) skal vere satsingar som skal trekke meir turistar til Tunisia.
Det har vore mindre turistar i Tunisia dei siste åra. Her frå ei strand ved Djerba.
Foto: Paul Schemm / ApMista over millionar av turistar på to år
Mangel på turistar har vore eit stort problem heilt sidan revolusjonen i 2011, då den arabiske våren starta i nettopp Tunisia.
I rekordåret 2010 var 7,1 millionar turistar innom landet, medan dette falt ned til 4,7 millionar i revolusjonsåret 2011. Deretter har det vore ein stadig vekst fram til i dag.
– Me er sikre på at dette vil fortsette å bli betre. Me er verken optimistar eller pessimistar. Me er berre bestemte, sa Rekik i går.
- LES OGSÅ:
«Eg elskar Tunisia. Staden å vere no», står det på plakaten. Tunisia har brukt mykje krefter på å få turistane tilbake att etter revolusjonen i 2011.
Foto: FABRIZIO BENSCH / ReutersStyresmaktene og turistnæringa har saman jobba hardt for å kome opp att til gamle høgder. Men akkurat det vert ikkje lettare etter dagens angrep, der turistar såg ut til å ha vore sjølve målet for terroristane.
Noreg er eit av fleire land som har kome med reiseråd. Utanriksdepartementet ber alle som er i Tunisia eller som skal reise dit om å halde seg oppdatert og registrere si reise ved ambassaden i Algerie.
