Meir enn 506 unge kvinner og barn skal ha blitt kidnappa heilt nord i Nigeria. Det melder Reuters som har snakka med menneske som bur i byen.
– Tok med seg gislane då dei flykta
Boko Haram vart i helga jaga ut av Damasak av styrker frå Tsjad og Niger, og det er folk som no er frigitte som har sagt til Reuters at minst 500 menneske er kidnappa.
Terrorgruppa skal ha tatt med seg gislane då dei flykta frå byen.
– Dei tok med seg 506 unge kvinner og barn. Dei drap femti av dei før dei reiste, fortel den lokale handelsmannen Souleymane Ali.
– Me veit ikkje om dei har drepe dei andre etter at dei reiste vidare, men dei tok dei med seg, legg han til.
Bilete som er komne ut frå byen viser mange rotne lik, og det er tydeleg at øydeleggingane har vore store.
(Saka held fram under videoen)
Snart val i Nigeria
Det er langt frå første gong at Boko Haram kidnappar kvinner. Den aller mest kjente hendinga er då terrorgruppa kidnappa godt over 200 skulejenter frå byen Chibok. No skal det vere snakk om nesten dobbelt så mange gissel som er tekne.
- LES OGSÅ:
Til helga er det val i Nigeria, eit land der det har vore mykje uro dei siste åra. Terrorgruppa Boko Haram har laga mykje uro i form av drap, terrorangrep og kidnappingar.
I førre veke sa president Goodluck Jonathan at han trudde terrorgruppa ville vere nedkjempa innan ein månad, og at dei vart svakare for kvar dag som går.
- LES OGSÅ:
President Jonathan har mista stadig meir terreng på meiningsmålingane til motstandar Muhammadu Buhari. Då presidentvalet vart utsett tidlegare i år var det mange som meinte at Jonathan gjorde dette for å kjøpe tid til å skaffe seg meir støtte.