Det var ein livvakt som stod bak sjølvmordsangrepet i Damaskus onsdag, ifølgje ei kjelde i dei syriske tryggingsstyresmaktene. Både forsvarsministeren, Daoud Rajha, og svogeren til president Bashar al-Assad er blant dei drepne i åtaket.
I tillegg er innanriksministeren såra i det som er det største og mest alvorlege slaget mot Assad-regimet sidan opprøret braut ut i mars i fjor.
Slike angrep undergrev moralen internt i regimet, og konsekvensen kan bli at fleire hoppar av, meiner Helge Lurås, som er leiar ved Senter for internasjonal og strategisk analyse (SISA).
– Regimet slår sprekkar
– Det er lojaliteten internt som avgjer kor raskt regimet fell. Når tilliten sviktar, byrjer regimet å slå sprekkar, seier Lurås til NTB.
No er sjansane minimale for at president Bashar al-Assad skal klare å attvinne kontrollen i heile Syria, meiner han.
Den frie syriske hæren, som er den største væpna opprørsgruppa i Syria, har uttalt at ein storoffensiv mot Damaskus no er i gang. Men Lurås er likevel ikkje sikker på at det er det endelege slaget om Damaskus vi er vitne til no.
– Eg trur ikkje vi skal ta det for gitt at vi ser det same i Damaskus no som vi såg i Tripoli i fjor, seier han.
I Tripoli gjennomførte opprørarane eit nøye planlagt angrep.
– Det vi ser no, kan vere eit krafttak frå opprørarane si side på å skape eit inntrykk av at Assads dagar er talte, seier Lurås.
– Må ikkje tru på snarleg slutt
Midtausten-ekspert og forskar ved Universitetet i Oslo (UiO), Kai Kverme, gir Lurås rett i at dagens åtak er eit veldig hardt slag for regimet.
– Dette råkar kjernen av det syriske regimet, ikkje minst svogeren til Assad som har ein nøkkelposisjon i regimet, seier Kverme.
Den russiske utanriksministeren har også omtalt dette som eit avgjerande slag. Er du av same oppfatning?
– På mange måtar er det avgjerande. Ein må ikkje tru at dette blir avgjort veldig fort, men dersom ein greier å gjennomføra aksjonar som dette og regimet i tillegg mistar kontrollen over bydelar i hovudstaden, er det ein heilt umogleg situasjon for regimet, svarar Kverme.
Å overgje seg, har lenge vore det einaste alternativet for presidenten, som tviheld på makta trass i 16 månader med kraftige opptøyar mot han.
– Men eg trur diverre at han, på lik linje med Gaddafi, vil nekta å overgje seg. Dette er eit regime som har stått bak grusomme lovbrot. Han vil heilt klart bli straffa hardt dersom han overgjev seg, seier Kverme.
– Han har sjløv signalisert at han og regimet ikkje er villige til å gå inn på ei politisk løysing, men snarar prøva å slå ned på dette med militær makt. Diverre trur eg me har meir vald i vente, avsluttar han.