Forsvarsminister Mohamed Fiqi lovar at dei skuldige skal bli straffa.
Foto: MUSTAFA ABDI / AfpSoldaten skal ha krangla med kollegaer då han ifølgje augevitne fyrte av det maskindrive luftverngeværet. Våpenet skal ha låst seg, og eit regn av kuler trefte folk som var samla i gata.
Det er ikkje kome meldingar frå offisielt hald om kva som var årsaka til at våpenet vart avfyrt, men sjukehuspersonell kallar hendinga ei tragedie.
– Vi har teke imot 56 såra og 12 døde, i tillegg er fem personar døde etter at dei kom til sjukehuset, opplyser direktøren frå Medina-sjukehuset Mohamed Yusuf til nyheitsbyrået AFP.
Forsvarsminister Mohamed Fiqi i den somaliske regjeringa lovar at dei skuldige skal bli straffa, og at dei såra skal få hjelp.
Ein offiser fortel at dei uansett vil undersøkje det som har skjedd.
– Vi etterforskar korleis dette kan ha skjedd, og vi kan ikkje seie om soldaten avfyrte geværet ved eit uhell, eller om han drap desse menneska med vilje, seier Mohamed Ali.
