– Å stå opp mot farlege, mørke regime er aldri enkelt

WASHINGTON (NRK): Israels statsminister, Benjamin Netanyahu, vart møtt med trampeklapp då han kom til den amerikanske kongressen i ettermiddag. Der hamra han laus mot Iran – akkurat som venta.

US-ISRAEL-CONGRESS-NETANYAHU

Benjamin Netanyahu gjekk som venta hardt ut mot Iran under sin tale i den amerikanske kongressen.

Foto: MANDEL NGAN / Afp

USA-ISRAEL/ Israeli Prime Minister Netanyahu is applauded while addressing a joint meeting of Congress on Capitol Hill in Washington

Ståande applaus og trampeklapp møtte Netanyahu i den amerikanske kongressen. Særskild brei støtte fekk han blant republikanarane i salen.

Foto: JONATHAN ERNST / Reuters

Det var lang kø utanfor den amerikanske kongressen då Netanyahu starta sin tale inne i kongressalen. Og då Israels statsminister Benjamin Netanyahu kom inn i salen vart han møtt med ståande applaus og trampeklapp.

– Gamalt hat i nye former

Det var venta at Netanyahu skulle snakke om samtalane som USA har gåande med Iran om det sistnemnde lands atomprogram. Og nettopp det gjorde Netanyahu.

  • SJÅ MEIR OM FORHOLDET MELLOM USA OG ISRAEL I URIX PÅ NRK2 I KVELD KLOKKA 22.30

– Eg har kome her for å snakke om mitt lands eksistens. I dag står det israelske folk overfor forsøk på å utrydde oss. Irans øvste leiar spyr ut gamalt antisemittisk hat med moderne teknologi, sa Netanyahu og viste til ei Twitter-melding som Irans øvste leiar Ali Khamenei la ut på nettet i november.

Netanyahu hamra vidare med krass kritikk mot Iran, og vart møtt med nye ovasjonar og meir trampeklapp i den amerikanske kongressen.

– Å nedkjempe IS gjennom å tillate Iran å få atomvåpen vil vere som å vinne ein kamp, men å tape krigen, sa Netanyahu, til stor applaus.

US-ISRAEL-POLITICS-PROTEST

Mange støttespelarar hadde møtt opp utanfor den amerikanske kongressen då Netanyahu skulle tale.

Foto: CHRIS KLEPONIS / Afp

– Ein veldig dårleg avtale

Han sa vidare at Iran ikkje berre er ein trugsel for Israel, men også for heile verda.

– Me må alle stå saman for å stoppe Irans marsj mot erobring, underleggelse og terror, sa den israelske statsministeren frå talarstolen.

– Dette er ein dårleg avtale. Ein veldig dårleg avtale, som me klarar oss best utan. Alternativet til ein avtale er ikkje krig, alternativet er ein mykje betre avtale, sa Netanyahu.

– Gud velsigne USA

Han meiner at ein eventuell avtale må innehalde mykje strengare krav til Iran.

– Å stå opp mot Iran er ikkje enkelt. Å stå opp mot mørke, farlege regime er aldri enkelt, sa den israelske statsministeren.

Statsministeren brukte også tid på å rose president Barack Obama, og takke USA for all hjelp.

– Må Gud velsigne USA. Takk Amerika, de er vidunderlege, avslutta Netanyahu, og vart møtt med ytterlegare jubel og applaus.

Det kvite hus er lite begeistra

Det kvite hus har på førehand ikkje vore begeistra for at Netanyahu skal tale i Kongressen samstundes som forhandlingane med Iran går føre seg. Det er republikanske kongressmedlem som har invitert statsministeren til å tale.

USA og Iran er for tida i forhandlingar i Sveits, der målet er å kome fram til ein avtale innan 31. mars. Også EU seier i dag at det er lite til hjelp om Netanyahu kritiserer dei pågåande forhandlingane.

Benjamin Netanyahu er ikkje invitert til det ovale kontor for å møte Obama. Den offisielle forklaringa for dette er at USA av prinsipp aldri tek mot statsleiarar som er midt i ein valkamp. Den israelske valkampen starta offisielt i dag.

Republikanerene hadde invitert Netanyahu til kongressen, Obama ble ikke informert på forhånd.

Sjå USAs utanriksminister rapporter frå Washington. Sendt i Dagsrevyen 3. mars.

SISTE NYTT

Siste nytt