Dei døde blei funne på ei strand nær byen Crotone og i havet utanfor Steccato di Cutro i regionen Calabria. Det er fleire born blant dei døde, seier Manuela Curra, som er talsperson for styresmaktene i regionen.
Ifølgje Curra gjekk båten frå Izmir i Tyrkia for tre eller fire dagar sidan, og hadde med seg migrantar frå Afghanistan, Iran og mange andre land.
Overlevande har fortalt at det var mellom 140 og 150 menneske om bord. 20 av dei er sende til sjukehus.
Båten - ein seglbåt i tre - forliste då han trefte klipper eller rev nær kysten.
Redningsarbeidarar fører i land ein omkommen person.
Foto: Giuseppe Pipita / APDårleg vêr
Politi, redningsmannskap og frivillige søkjer etter fleire overlevande utanfor kysten, men arbeidet er vanskeleg på grunn av dårleg vêr.
– Dette er ein enorm tragedie som viser at det er absolutt nødvendig å setje ein stoppar for dei ulovlege migrasjonsrutene, seier den italienske innanriksministeren, Matteo Piantedosi.
Vrakrestar frå båten som havarerte har skylt i land nær Crotone.
Foto: Giuseppe Pipita / AP8400 migrantar har drukna
Dei siste fire åra har 8.468 menneske døydd eller blitt melde sakna mens dei prøvde å krysse Middelhavet for å ta seg til Europa.
Det går fram av ein rapport som Redd Barna la fram i førre veke, skriv NTB.
Redningsmannskap i arbeid på stranda der dei døde blei funne.
Foto: Giuseppe Pipita / APOrganisasjonen skriv at rundt 500.000 personar har prøvd å ta middelhavsruta til Europa. Fleire nordafrikanske land er blitt knutepunkt for migrantar frå kriseråka land i Afrika og Midtausten som ønskjer å ta seg til Europa.
Redd Barna legg delvis skulda for dødsfalla på «den veksande trenden der europeiske regjeringar med kraft, på ulovleg og ofte valdeleg vis, stansar flyktningar som vil ta seg inn i territoriet deira», og skriv at dette er basert på analyse av data frå FNs høgkommissær for flyktningar (UNHCR).
