Fleire titals personar skal ha vore inne på fabrikken då den tragiske ulukka skjedde.
Ifølgje den arabiske fjernsynsstasjonen Al Arabiya, er minst 150 menneske døde og 90 skadde. Det er både born, kvinner og menn blant dei omkomne.
Legar som er på staden seier til Reuters at dødstalet truleg vil stiga ytterlegare etterkvart som redningsmannskapet får oversikt over situasjonen.
– Ulukka er ein total katastrofe. Det er så mange brende lik her. Eg greier ikkje eingong å skildra situasjonen, seier ein dokter ved eit offentleg sjukehus.
– Sigarett kan ha utløyst brann
Produksjonsanlegget ligg i nærleiken av den vesle byen Jaar, sør i Jemen.
Årsaka til eksplosjonen er førebels ukjend, men augevitne seier til Reuters at ein sigarett kan ha utløyst ein brann i lokala.
Ei kjelde seier til AFP at terrornettverket al-Qaida har kontroll over byen, som ligg i Abyan-provinsen nær Adenbukta.
Plyndra av al-Qaida
Den dødelege eksplosjonen fann stad dagen etter at fabrikken blei plyndra av al-Qaida.
Rundt 30 væpna og maskerte menn stakk søndag frå staden med fleire kassar fulle av våpen.
Våpenfabrikken skal ha gått i lufta medan lokale innbyggjarar var jakt etter «ammunisjons-rester» etter plyndringa.
