Dei 100 palestinarane har vore haldne fengsla under såkalla administrativ forvaring, ei israelsk ordning som gjer det mogleg å halde folk i fengsel i lengre tid utan at dei er dømde i retten.
Toppmøter
Israel gjer dette som eitt av fleire tiltak for å skape ei meir positiv atmosfære framfor toppmøta i Sharm el-Sheik i Egypt i dag og i Akaba i Jordan i morgon.
I dag møter USAs president George W. Bush Egypts president Hosni Mubarak og den palestinske statsministeren Mahmoud Abbas, også kjend som Abu Mazen, i den egyptiske badebyen Sharm el-Sheikh. Temaet på møtet er det såkalla vegkartet for fred mellom Israel og palestinarane, som blant andre USA og Russland har lagt fram.
USAs president George Mush møter i dag sin egyptiske kollega Hosni Mubarak og andre arrabiske leiarar i Sharm el-Sheikh. (Reuters-foto: Jason Reed)
I morgon skal George W. Bush møte Israels statsminister Ariel Sharon, Mahmoud Abbas og Jordans kong Abdullah i den jordanske Raudehavsbyen Akaba.
Busetjingar
I eit intervju med den israelske avisa Haaretz seier presidenten i den israelske nasjonalforsamlinga, Reuven Rivlin, at statsminister Ariel Sharon vurderer å gi opp 17 israelske busetjingar på Vestbreidda i samband med ein eventuell fredsavtale.
- Sharon har fleire gongar gjort det klart at det er naudsynt å gi opp desse busetjingane for å få til ein fredsavtale, seier Rivlin til avisa. Sharon vil gjere dette for å knyte saman palestinske område, slik at dei ikkje må gjennom israelske busetjingar for å kome til andre delar av Vestbreidda.
Rivlin gjer merksam på at han sjølv er usamd med Sharon i denne saka. Han gjer det også klart at dei isaraelske busetjingane Netzarim, Kfar Darom og Gush Katif på Gazastripa ikkjer trua.
Meir vald
Samstundes held valden fram i dei palestinske områda. I går kveld vart ein 47 år gammal palestinsk politimann treft av ei kule i bakhovudet medan han bemanna ein vaktpost mellom dei to byane Beit Lahiya og Beit Hanoun nord på Gazastripa.
Tidlegare på dagen i går vart tre palestinske tenåringar lettare såra då israelske styrkar skaut mot steinkastarar.
I dag vart sju palestinske ungdomar skadde i flyktningleiren Balata i Nablus, etter at israelske soldatar gjekk inn i leiren i dag tidleg. Det var innført portforbod medan soldatane gjennomførte fleire husransakingar. Soldatane var truleg på jakt etter ein lokal leiar for Al Aqsa-brigadane, ei militant gruppe som har stått bak fleire sjølvmordsaksjonar mot israelske mål.
Huset til ein fengsla militant palestinar vart sprengt i lufta i landsbyen Deir al-Ghammsa like utanfor Tulkarem.
Amnesty International opplyser at Israel har øydelagt 2000 palestinske hus sidan starten på den andre intifadaen i måndsskiftet august/september år 2000.
I Hebron vart sju palestinarar arresterte i ein aksjon i Hebron. To av dei skal tilhøyre Islamsk Jihad, eig gruppe som også har stått bak fleire sjølvmordsaksjonar mot israelske mål.