- Vi har jernvilje til forsvar

Netanyahu snakka til journalistar på Ben Gurion-flyplassen i kveld, før han reiste på ein 24 timar langt besøk i Moskva.

- Israel vil handle aggressivt, ansvarleg og klokt for å oppretthalde ro og tryggleik, seier han.

Netanyahu seier dette etter at Jerusalem vart ramma av ei terrorhandling i ettermiddag , der eitt menneske døydde og over 30 vart såra. I natt vart det skote rakettar frå Gazastripa mot fleire israelske byar, og Israel svarte med bombing av mål på Gazastripa.

I går vart åtte menneske drepne på Gazastripa i israelske angrep, etter at det var skote rakettar og granatar mot Israel frå området.

I kveld seier ein talsmann for Hamas, makthavarane på Gazastripa, at dei vil sørgje for å gjeninnføre ro og orden i området. Han gjer det klart at Hamas ynskjer å vende tilbake til situasjonen slik han var før konflikten vart trappa opp.