Norske Grethe Østern er tilsett i Norsk Folkehjelp, men arbeider på ICAN-kontoret. Ho fortel om ei spent stemning der fredag føremiddag.
– Vi sat og fylgde med på direktesendinga på NRK. Vi hadde eigentleg gitt opp håpet om å få prisen, fordi vi trudde at vinnaren ville få beskjed tidlegare. Vi førebudde oss på at atomavtalen med Iran ville få Nobels fredspris for 2017, og vi gjorde klar ei fråsegn, seier ho til NRK.
På direktesendinga sa tidlegare sekretær for Nobelkomiteen, Geir Lundestad, på eit tidspunkt at vinnaren nok alt hadde fått beskjed.
– Då var vi sikre på at det ikkje ville bli oss. Og då telefonen kom klokka 10.50 trudde vi først at det var ein tulle-telefon. Men då vi forstod at det var alvor, var det full jubel, seier Grethe Østern.
Det var leiar i ICAN, svenske Beatrice Fihn, som tok telefonen då Nobelkomiteen ringde ti minutt før vinnaren skulle offentleggjerast.