Samstundes gjer 60-åringen det klart at ho er klar for ein dialog basert på tillit med nabolandet i nord.
– Den nordkoreanske utskytinga av ein langdistanserakett nyleg viser kor alvorleg situasjonen. Men eg lovar å skape ein ny æra på den koreanske halvøya, basert på diplomatisk tillit, sa ho blant anna i den første talen sin etter at valsigeren var eit faktum.
Dårleg forhold til Nord-Korea
Forholdet mellom dei to koreanske statane har vore dårleg under den noverande presidenten, Lee Myung-bak. Han har blant anna stilt krav til Nord-Korea om å avslutte landet sitt atomprogram før det vart snakk om økonomisk og humanitær hjelp frå sør til nord.
Park Geun-hye har under valkampen sagt at det kan bli aktuelt å starte opp igjen hjelpesendingane til Nord-Korea, samstundes som ho ynskjer ei opprusting av det sørkoreanske forsvaret.
Nord-Korea har enno ikkje kome med ein offisiell reaksjon på det sørkoreanske presidentvalet, men har tidlegare kalla partiet hennar, Saenuri, ein gjeng med tullingar.
LES OGSÅ:
LES OGSÅ:
Første kvinnelege president
Det offisielle nordkoreanske nyheitsbyrået KCNA skulda nyleg partiet, under leiing av avtroppande president Lee Myung-bak, for å ha auka spenninga på den koreanske halvøya.
– Alle fakta tyder på at Saenuri-partiet er ein gjeng svikarar som tyr til alle former for djevelskap for å halde seg ved makta, heiter det i ein artikkel frå nyheitsbyrået.
Park Geun-hye, dottera til den tidlegare militærdiktatoren Park Chung-hee, blir den første kvinnelege presidenten i Sør-Korea.
LES OGSÅ:
LES OGSÅ:
Høg valdeltaking
Det var eit oppmøte på 75,8 prosent i presidentvalet tysdag, og dette er langt høgare enn ved tidlegare presidentval. Park fekk 51,6 prosent av røystene, medan utfordraren, den liberale Moon, fekk 48 prosent.
Medan ein ventar på ein reaksjon frå Nord-Koreas nye sterke mann, Kim Jong-un, så er dei store industriselskapa i Sør-Korea, som går under namnet chaebol, letta etter at Park vann valet.
Dei største chaebol-selskapa, blant andre Samsung og Huynday, slepp no å tenkje på at det kan kome ein ny eigarskapspolitikk, slik den tapande presidentkandidaten hadde foreslått.
– Rettferdig fordeling
Park har likevel sagt at ho ynskjer ei meir rettferdig fordeling av rikdomen i landet, men kjem ikkje til å innføre nye skattar for store selskap eller gjere andre ting som kan oppfattast som eit angrep på rettane til chaebol-selskapa.
– Ho har ingen planar om å endre strukturen til chaebol-selskapa og deira økonomiske makt, seier Kim Sang-jo, økonomiekspert frå Hansung-universitetet, til nyheitsbyrået Reuters.