Søndag 20. oktober er det duka for TV-aksjonen. I år går pengane til Care Norge som skal løfte kvinner ut av fattigdom i nokre av dei mest sårbare områda i verda.
Sjølv om det framleis er ei lita stund til sjølve aksjonen med bøsser og tv-sending, kan du allereie nå tjuvstarte på årets aksjon ved å legge inn bod på auksjonen.
Du kan blant anna by på dette:
1. Kanalvert-annonsering på NRK1
Vinnaren av auksjonen får vere med å forme og utføre ei annonsering av eit program på NRK1. Det skjer i samarbeid med kanalvert Ingvild Helljesen, og kanskje blir det favorittprogrammet ditt du får introdusere.
Før Lindmo på fredag var Robert Stoltenberg gjest hos kanalvert Ingvild Helljesen for å snakke om ein av tinga du kan by på under auksjonen.
2. Morgenklubben-sending heime hos deg
Lyst å drikke morgonkaffi med gjengen på bildet under?
Få Morgenklubben si fire timar lange direktesending heim til deg, enten privat eller til bedrifta di.
3. Namnet ditt i neste Jo Nesbø-bok
Kva med å bli med på ei temmeleg eksklusiv liste? På auksjonen kan du by på at namnet ditt blir med i neste bok av Jo Nesbø.
4. NRK sitt VM-bord frå Seefeld med autografar frå utøvarane
Under sendinga frå VM-studio i Seefeld, brann alle medaljevinnarane namnet sitt inn i bordet som stod i studio. Nå kan det bli ditt, til odel og eige.
5. Originalmanuset til Kristoffer Hivju sin favorittepisode i tv-serien Game of Thrones
Saknar du Game of Thrones-universet? Då kan du trøyste deg med at du nå kan få tak i eit originalmanus frå favorittepisoden til Hivju – Battle of the Bastards. Manuset kjem med handskrivne notat frå skodespelaren sjølv.
Fann du ikkje noko du ville kjøpe på TV-aksjonen sine auksjonssider? Då kan du sjekke ut fleire ting på P3-aksjonen sin auksjon her.