Då TV-sendinga var over 21. oktober, jubla generalsekretær i Kirkens Bymisjon, Adelheid Firing Hvambsal. Det hadde då kome inn 239,6 millionar kroner til TV-aksjonen.
Nesten to månadar seinare kan ho juble enda meir, for pengane fortsette å kome inn etter aksjonsdagen.
Endeleg resultat er no talt opp til 257,4 millionar. Eller for å vere meir presis: 257.449.536 kroner.
– Det er fantastisk å sjå kor rause det norske folket er, seier Firing Hvambsal.
Anonym givar
100.000 bøssebærarar banka på dørene i heile landet 21. oktober for å samle inn pengar, men ikkje alle fekk gitt den dagen likevel.
Nokon som veit kven den anonyme givaren er?
Foto: Ida Scheie / NRKEin anonym givar sende like gjerne pengane direkte til TV-aksjonen sin redaksjon. I ein god gamaldags konvolutt frankert med frimerke låg det ein 200-lapp, utan avsendar. Redaksjonen sørga for at pengane kom til rett mottakar, og den anonyme givaren kan dermed vere nøgd med å ha bidratt inn til innsamlingsrekorden.
Fleire tiltak
Kirkens Bymisjon hadde planlagt at inntektene frå TV-aksjonen skulle gjere det mogleg å starte opp kring 60 konkrete tiltak fordelt over heile landet.
– Ved at vi fekk inn meir enn vi hadde håpa på, ser vi no at vi kan nærme oss heile 70 tiltak, fortel generalsekretæren.
Tiltaka er ein del av Kirkens Bymisjon sitt arbeid for eit varmare og meir inkluderande samfunn. Dette inkludererar mellom anna arbeidstiltak, utlånssentralar for barn og unge, og akuttovernattingar.
– Vi veit at desse tiltaka betyr mykje for mange, og vi er glade for den tillita det norske folk har gitt oss gjennom sine bidrag til årets Tv-aksjon, seier Firing Hvambsal.
Samlande
Kringkastingssjef Thor Gjermund Eriksen gler seg over at dugnaden framleis står sterkt i Noreg.
– Særleg i desse digitale tider er det godt å sjå at TV-aksjonen står sterkt, og at det er mogleg å skape eit så breitt engasjement. Det viser at vi framleis treng ein slik samlande arena, seier Eriksen.
