Fleire dørseljarar har kome til Trondheim frå område med stort smittetrykk. No ber kommunen folk vere på vakt for å unngå å bli smitta av dørseljarar.
– Det har i minst to tilfelle blitt henta inn dørseljarar til Trondheim frå område i landet med høgt smittepress. Det anbefaler vi ikkje, seier kommuneoverlege Tove Røsstad som i dag gjekk ut med ei åtvaring til folk.
Smittetilfellet i Bergen
I oktober blei ei eldre kvinne i Bergen sett i karantene etter at ho hadde hatt besøk av ein koronasmitta seljar.
Det har ikkje blitt påvist smitte mellom dørseljarar og kundar i Trondheim til no under pandemien. Likevel ber kommuneoverlegen folk følgje med.
– Det er umogeleg for kundane å vite om seljaren er lokal eller kjem frå ein stad med mykje smitte. Difor gjeld det å vere forsiktig, understrekar Røsstad.
Oppfordrar folk til å ikkje sleppe seljarar inn i huset
Regjeringa anbefaler folk å ikkje ha meir enn to personar på besøk kvar veke.
– Burde ein drive med dørsal no?
– Man kan drive med dørsal, men seljaren skal vere veldig bevisst på at han kan vere smitta, seier Røsstad.
Kommunen oppfordrar både kundar og seljarar til å ta ei rekkje forholdsreglar ved dørsal.
Her er råda:
- Hald avstand til kvarandre.
- Seljarar bør bruke munnbind dersom dei får komme inn i heimen.
- Møtet mellom seljar og kunde bør helst gå føre seg utandørs, og med god avstand.
- Kunden bør bruke eigen penn ved signering av avtalar. Ved signering på til dømes ein Ipad bør ein sprite hendene og nettbrettet før signering.