22. august står Sven Joakim Thåström på scenen på Marinen i Trondheim.
Som frontfigur i høgt legendariske Ebba Grön og Imperiet i tillegg til en blomstrande solokarriere har vokalisten meisla ut namnet sitt i nord-europeisk musikkhistorie.
I 2006 kapra Sven Joakim Thåström førsteplassen på svenske hitlister med plata Solo vol 1. I mars kom det nyaste soloalbumet hans Kärlek är för dom.
Elektronisk musikk
Det blir også mykje elektronisk musikk når gruppa Röyksopp går på scenen. Röyksopp blei offisielt danna i 1998 og debuterte med singelen So Easy.
Men det var først i 2001 Röyksopp verkeleg slo gjennom med den internasjonale monsterhiten "Eple" frå plata Melody A.M. No er duoen frå Tromsø klare med sitt tredje album. Det heiter Junior og blir sluppe 23. mars.
Fleire på papiret
Leiinga for Pstereofestivalen har fleire namn på blokka.
Indie-elektronikarane Late of the Pier frå England, Slagsmålsklubben frå Sverige og Fjorden Baby frå Bergen er alle klare for å spele i Trondheim i slutten av august.
Ifølge leiinga for festivalen er Slagsmålsklubben svært populære i Trøndelag. Etterspurnaden etter billetter i forkant av bandets siste besøk på Blæst var såpass høgt at svenskane kunne spelt tre utselte konsertar på rad.
Tredje festival
Pstereo blei for første gong arrangert på Torvet i Trondheim i 2007 der NOFX, The Lemonheads og Monomen var blant hovudattraksjonane.
I 2008 flytta Pstereo til Marinen og artistar som bob hund, Clutch og DumDum Boys stod på scenene.
Pstereo 09 blir den 21. og 22. august, med Nidelven som bakgrunn og Nidarosdomen som nærmeste nabo.
