Østersund og Sør-Trøndelag har sett på mulegheitene for ein felles OL-søknad frø, men det prosjektet blei det ikkje noko av.
No ønskjer altså Østersund igjen å samarbeide med sør-trønderne. Ein av grunnane er kostnadene, seier kretsidrettssjef i Jämtland-Härjedalen, Bertil Karlsson.
- Trønderane har allereie både hoppbakke og skistadion ståande ferdig. Det er også snakk om å ha fleire hotell, seier Karlsson til NRK.
Positive trønder
Sør-Trøndelag idrettskrets er positive til eit samarbeid, og meiner det slett ikkje er umuleg med norsk hjelp.
- Om Østersund kjem til oss, har vi Granåsen og anlegga der klare til bruk. Vi ønskjer gjerne store arrangement til Trøndelag, men det må vere i samarbeid med sentrale styresmakter, seier dagleg leiar i Sør-Trøndelag idrettskrets, Kjell Dahle.
Han legg til at dei heller vil støtte Tromsø om dei vel å søke.
Ingen god løysing
Styremedlem i den internasjonale olympiske komiteen, Gerhard Heiberg, ønskjer ein Trøndelag/Østersund-søknad velkommen, seier at løysinga ikkje er ideell.
- Dei kan søke, men det gjeld å få mest muleg kompakte leikar, og avstanden mellom Trondheim og Østersund kan bli i største laget, seier Heiberg.
