– Det er mogleg med omkøyring, men det ville teke 2 timar og 30 minutt kvar veg. Det tenkjer vi at vi ikkje kan utsetje elevane våre for.
Det seier rektor ved Kolvereid skule, Unni Berit Finne.
Måndag morgon vart 25.000 medlemmer av Landsorganisasjonen (LO) og Yrkesorganisasjonenes Sentralforbund (YS) teke ut i streik. Det har også gått ut over ferjetilbodet i landet.
For når alternativet for elevane ville vorte 25 timar reise til og frå skulen i løpet av veka, var «streikeskulen» på Salsbruket i Nærøysund kommune eit faktum.
Det er eit tidlegare eldresenter og no forsamlingshus.
Elevar frå 2. til 9. trinn
Det er ni elevar som til vanleg reiser frå Salsbruket til Kolvereid for å gå på skulen. Fem elevar har ordna seg med andre løysingar, eigen båtskyss eller buplass i nærleiken av Kolvereid.
For fire av elevane var «streikeskulen» på Salsbruket eit fullgodt alternativ.
På skulen går det elevar i 2. til 9. klasse.
– Elevane synest at det er veldig greitt. No kan dei gå til skulen, i tillegg til at dei kjem heim tidlegare, seier lærar Turid Angelo.
– Korleis er det å undervise elevar på fire ulike trinn?
– Det går greitt. Kolvereid er ein «iPad-skule». Elevane får eit eige opplegg frå skulen og oppgåva mi blir å hjelpe dei undervegs.
Førebudd på streik
«Streikeskulen» var på plass allereie dagen etter at streiken braut ut.
– Vi visste at det kunne bli streik, så vi hadde allereie diskutert denne løysinga, seier Angelo.
Det var søndag ettermiddag det vart brot i meklinga mellom partane i lønnsoppgjeret, som førte til at medlemmer vart teke ut i streik frå måndag morgon.
– LO kravde auka kjøpekraft for medlemmene sine og eit løft for dei lågtlønte. NHO har valt å avvise krava våre, og sender dermed landet ut i streik, sa LO-leiar Peggy Hessen Følsvik til NRK søndag.
Rektor Finne fortel at dei allereie fredagen i førevegen hadde lagt ein slagplan for om partane i streiken ikkje skulle bli samde.
Heimeskule måndag og på plass i lokala tysdag.
Håpar på snarleg løysing
Rektor Finne seier at dei håpar elevane kjem tilbake så fort som mogleg, men at «streikeskulen» vart ei god løysing når situasjonen vart som han vart.
Det synest også Turid Angelo.
– Det beste for dei er å vere på skulen. Det går greitt denne veka her og neste veke, men det kan jo bli litt vanskeleg i lengda for alle.
Har du nokre spørsmål om streiken? Ekspertane svarer på spørsmåla dine: